Avûkat Mehdî Ozdemîrî derheqê tecrîd, heqê hêvî û ''Vengdayîşê Haştîye û Komelê Demokratîkî'' yê Rayber Apoyî de ANFyî rê qisey kerd.

Mehdî Ozdemîrî bale ante muhîmîya vengdayîşî ser û nê vatî: ''Bi nê vengdayîşî semedê muntişê haştîya komelkî ya semedê çareserkerdişê mendeyî yê meseleya kurdan hêvîyêke vejîyaye werte. Heta nika pêro adirbirnayîşê ke ameyî kerdene pêro negatîf qedîyayî. Çunke dewlete polîtîkaya çarserkerdişê meseleya kurdan nê, eslê xo de polîtîkaya semedê mendekerdişê mesele rayra bena. Ewro ma wazenê ke proseso ke yeno ciwîyayene wa na nuqta de nêbo. Hêvîya ma nê merhale de est a.''

Ozdemîrî ard ziwan ke problemê ke bi rayîranê bêhuqûqî ameyî afirnayene û bîyî mende, polîtîkayêka dewlete ya û vina dewam kerd: ''Tecrîd yeno no mana ke kesêk zîndan de yeno îzolekerdene, heqanê xo yê sosyalan ra mehrum yeno verdayene  la bi ewnîyayîşê polîtîkî tecrîdê serê Birêz Abdullah Ocalanî dahîna hîra yo. Tecrîd nêverdano ke  rol û berpirsîyarîya xo bîyaro ca. Birêz Ocalan tek muxatabê çareserkerdişê meseleya kurdan o. Seba ke muxatabîya xo bikero  gerek şertê ci yê fîzîkîyî bêrê azadkerdene ke bieşko rol û berpirsîyarîya xo bîyaro ca. Eke heqê hêvî bêro caardene heqê veradayîşê bişertî vejîyeno werte û eşkeno rol û berpirsîyarîya xo bîyaro ca. Gerek na bêadeletîya serê Birêz Abdullah Ocalanî û bi hezaran tepişteyanê bînan bêro wedaritene, bedilnayîşê qanûnî helêke cuwa ver bêrê kerdene.''