Hemvervatoxa Partîya Çepe ya Parlamentoyê Hamburgî Cansû Ozdemîre derheqê tawirê DYA yê hêrişanê Tirkîya de qisey kerd û vat, “Tawirê DYA etîk nîyo. No tawir û  bevengîya dewletanê binan berpirsîyarê hêrişan ê.”
 

Ozdemîre tawirê Ewropa yê verba îşxalkarîya dewlete Tirkî vist vîrî û va,“Ez nê gamanê Ewropa kêm vînena, peynîya nê hewte de heqê merdiman bi hewayêkê barbarî ameyî binpaykerdene. Serêkanîyê de konvoya sivîlan ameye bombakerdene. Sîyasetmedara Kurde Hevrîn Xelefe ameye qetilkerdene. YE ganî înan bigêre vere çiman û zêder qerar bigêre û tedayanê sere Tirkîya giranêr bike. Erdogan huyeno û YE tehdît keno.”

Ozdemîre vat ambazanê xo yê bînan ê wekîlan reyde YE ra waşt ke eşkerayîya şermezarkerdişî bêra dayene ke Tirkîya Peymana Neteweyê Yewbîyayeyî binpay kerde, Tirkîya ra bêra waştene ke îşxalkerdişê xo biqedne û yewîyanê xo Sûrîye ra tepîya biancê, serê Tirkîya bi asta mîyanneteweyî ambargoya çekan bêra dayene,Otonomîyêka Kurdîya ke hetê 5 endamanê daîmîyan ê Konseya Asayîşî ra bêra qetîkerdene, DAÎŞ’ijê ke zîndananê hêreme de tepişte yê, ganî mehkemeya mîyanneteweyî de bêrê hukmkerdene.

Ozdemîre derheqê tawiro hempar ê Kurdan de vat, “Ma seba yewîya neteweyî proseso girîng ciwîyenê. Ez rayraşîyayîşan de zî naye vînena. Çar parçayanê Kurdistanî de bi hezaran Kurdî rayîrêk de şinê. Wexto ke merdim her roje bêmabên naye bivîno û hîs biko, hîsêko zaf weş o.”