Nê rojanê peyênan de seba ke bi deyîranê kurdkî govende girewtêne 50 kesî tepişîyayî. Hemsereka DEM Partî ya Amedî Gulşene Ozer derheqê babete de ANFyî rê qisey kerd.

Gulşene îfade kerd ke polîtîkayê înkar û îmha yê vera kurdan dewam kenê û vat: ''Merdimî bi bahaneya govende tepişîyenê, şaristananê ma de nuşteyê 'Pêşî Peya' esterîyenê. Her hetî ra vera kultur û ziwanê ma hêrişî est ê. Na seserra 21ine de hema zî ferasetê dewlete yo nîjadperest berdewam o. Ma ney qebul nêkenê. Şarê ma do vera nê polîtîkayan wurzo payan ser.''

Gulşene dîyar kerd ke îqtîdar ziwan û govenda kurdan ra terseno û vat: ''Ma zanenê ke mesele govende nîya, hêrişê destkewteyanê kurdan yeno kerdene. Govend, slogan û deyîrê kurdkî goreyê qanûnan qedexe nîyê la îqtîdar qanûnan nêşinasneno. Ma do bi ziwanê xo, bi qiseyanê xo haştîye bîyarê ca. Ma do bi ziwan, kultur û govenda xo biciwîyê. Kurdî do nînan ra fek vera nêdê. Ziwanê kurdkî ziwanê bi mîlyonan merdiman o. Nê hêrişî hêrişê bêexlaq ê.''