Hemserekanê Pêroyî  yê DEM Partî Tulaye Hatîmogullari û Tuncer Bakirhanî yê ke Heyetê Îmraliyî de zî ca genê Serekê Pêroyî yê CHPyî Ozgur Ozelî reyde pêvînayîş kerd. Badê pêvînayîşî eşkerayîya çapemenîye ya hempare ameye kerdene.

Tulaye Hatimogullari nê vatî: ''Ma hem derheqê rojdemê Tirkîya de hem zî derheqê hêrişê vera elewîn ê Sûrîye de erjnayîşî kerdî. Ma derheqê vengdayîşê Birêz Abdullah Ocalanî de zanayîş da û înan zî vat pakatê demokratîkbîyayîşî hazir kenê ke tede çareserkerdişê meseleya kurdan zî est o. Nê demî de gerek meclîs, sîyaset û heme zemîno demokratîk înîsîyatîf bigîro.''

Ozgur Ozelî zî nê vatî: ''Şarî ma  vîjnayî ke ma meseleyanê ci çareser bikero. Eke hinî dayîkê tirkan û kurdan nêbermenê, gonî vindena gerek ma paştî bidê nê prosesî ke wezîfeyê xo bîyarê ca. Ma do semedê çareserkerdişê na mesele xîret bikerê. Zemîn parlamento yo. Ez vengdayîşê xo yê semedê Birêz Numan Kurtulmuşî reyna kenê. Gerek pêro biserûberkerdişê qanûnî yê ke hewce kenê, bêrê kerdene.

Ma paketê demokratîkbîyayîşî hazir kenê ke bi caardişê ci do meseleya kurdan de zî averşîyayîşî bibo. La eke no paket bêro redkerdene çareserî mumkun nêbena. Çunke çareserîya ke demokratîke nîya nêeşekena bibo mende. Gerek ma pêro pîya wayîrê nê prosesî bivejê. Semedê nê hîrê pêşnîyazê ma est ê.Demokrasî, demokrasî, demokrasî.''

Eşkerayîye de persî zî ameyî persayene. Hemserekê Pêroyî yê DEM Partî Tuncer Bakirhanî persê vengdayîşê Rayber Apoyî semedê QSDyî zî vîyartbar o? wina cawab kerd: ''QSD Sûrîye de ame ronayene û ûca gurîyeno, ma eleqedar nêkeno. Ma sey DEM Partî nêeşkenê derheqê QSDyî de qisey bikerê. Vengdayîş xora zelal o. Ma biewnê gureyê xo ra. Senî ke Birêz Ozgur Ozelî zî vat çîyo raşt o yo ke ma wezîfeyê xo bîyarê ca ke wa hinî çew memiro.''