Xebatkaranê çapemenîya azade bi wesîleya serrgêra 26. ya bombardumanê vera Rojnameyê Ozgur Ulke semedê Ersîn Yildizo ke hêriş de ame qetilkerdene aktîvîteya vîrardişî organîze kerde.

Parlamenterê HDPyî û îdarekarê ÎHDyî zî tede xeylêk xebatkarê çapemenîya azade tewrê aktîvîte bîyî. Aktîvîte fotografê Ersîn Yildiz û rojnameyê Yenî Yaşamî ke rêça Ozgur Ulke de yo ameyî kiriştene û pankarta ''Çapamenîya azade nêeşkena bêro hîşkerdene'' ameye akerdene.

Badê rêzgirwtişî verî Zekîye Turkerî ya ke waxtê bombardumanî de muxabîra rojnameyî bi qisey kerd. Turkerî vat: ''26 serrî cuwa ver ez tîya xebityayene. Rojêke ez ameya binaya ma herinda xo de çîn a. Bîna rijîyayî bî, nizdê 20 embazê ma birîndar bî û embaz Ersîn zî cuya xo vînî kerde bi. A roje ma cade xo ard pêser û bi manşetê 'No adir do şima zî bivêşno' rojname vet. Sey vizêrî ewro zî faşîzm dewam keno û rixmê heme hêrişan no rojname bi qerardarîye vejîyeno.''

Hemsereka  Pêroyî ya ÎHDyî Erene Keskîna ke wextê bombardumanî de avûkatê rojnameyî bî vat: ''Qerarê winayênî tim Daîreyê Herbî yê Taybetî de yenê girwtene. Ewro ma kitabanê vîrardişî de vînenê qerarê vera rojnameyî senî ame girwtene. Înan qerar girewt û ard ca. Coka ganî dewlete rind bêro naskerdene. Yew rojname ame bombardumankerdene û nuştoxê ci yo 75 serre ame kiştene la vengê çewî/e nêvejîya. Ma tik têna bî. No mucadeleyo zaf pîl o ke dewam keno.''

Mudirê Pêroyî yê rojnameyê Yeni Yaşamî Mehmet Ferhat Çelîkî zî vat: ''Ma 3ê kanûna 1994î de dejaye û hêrsbîyaye bî la ma zanayene ke ê bombayî qey vera ma ameyî teqnayene. Coka ma pêrune vatêne 'No rojname do siba zî vejîyo' û vejîya zî. Ma tîya yê, hela ke Kemal ame kiştene ma meydanê Newroze de bî, hela ke domanî ameyî qetilkerdene ma Roboskî de bî. Ma tim vera neheqîye raştîye nuştî, nusenê û do binusê.  Bedelê çi beno wa bibo ma da ma do bidê zî. Ma do bi xoverdayîşî ê zî bi qirkerdişî bêrê vîrardene.''