Merdimanê tepişteyanê nêweşan û tepişteyanê ke înfazê înan ameyo vêşnayene roja 296. ya Nobeta Edaletî de verê Edlîyeya Amedî de eşkerayîyêke daye.

Wekîlê HDPyî yê Amedî Hişyar Ozsoy, rêxistinê HDP û DBPyî, MEBYA-DER, TUAY-DER, OHD û Komeleya 78an zî tewrê çalakîye bîyî.

Çalakîye de verî Reşahate Ada qisey kerd û vat: ''Ma deyndarê domananê xo yê. Wa hînî qanûnî bêrê caardene. Ma nêwazenê zîndanî ra tabutî vejîyê. Heta çilka peyêne ya gonîya xo ma do hetê tepişteyan de bibê. Biciwîyo xoverdayîş.''

Ada ra dima Hişyar Ozsoyî qisey kerd û vist vîrî ke Aysele Tugluk rixmê nêweşîya xo hema zî zîndan de tepişîyena û vat: ''Wezîrê Edaletî heta nika seba tepişteyanê nêweşan çîyêk zî nêkerd. Hînî nê hukmatî ra ma çîyêkî zî nêpawenê. Ma nêzdî de hesabê nê kerdişanê înan bipersê. Îqtîdaro ke malanê şarî dizneno, do birijîyo û bêro muhakemekerdene. Ma do sey HDPyî heta peynî cayê nê dadîyan de bibê.

Îqtîdar sîyasetmedaran û keyeyanê înan binê nameyê 'têkoşînê vera terorî' de erzeno zîndanan. Nê dozger û dadgerî ê îqtîdarî yê, ê şarî nîyê.''