Hemvervatoxê Komîsyonê Têkilîyanê  Teberî yê HDPyî û Wekîlê Amedî Hişyar Ozsoyî derheqê rojdemî de ANFyî rê qisey kerd.

Ozsoyî îfade kerd ke hêrişê vera HDPyî xîretêko newe nîyê û destbendkerdiş û tepiştişê endamanê HDPyî xîretêko bîlasebeb o.

Ozsoyî vat: ''Waştêne Şaredarîya Qersî rê qeyûmêk tayîn bikerê. Nêzdî de Mehkemeya Heqanê Merdiman a Ewropa (MHME) derheqê Selahattîn Demîrtaşî de birêke bida. Ma pabeyê ci yê ke birêka xurte biba. Demîrtaş bi bahaneya Kobanê amebi tepiştene. Aseno ke destbendkerdişê nikayênî zî vera bira MHME yê. Meclîsê Tirkîya 6 serrî yo ke xîret keno Kobanê krîmînalîze bikero.Coka nameyê Kobanê tim pê teror û şîdetî xexilîyeno.

Meseleya kurdan tîya ra derbaz bîye û na mesele hînî asata globale de girîng a. Merdimê ke wazenê na mesele çareser bikerê yenê krîmînalîzekerdene. Warê mîyanneteweyî de welatanê Ewropa, Konseya Ewropa  û tay welatanê bînan Tirkîya têna verdaye. Hînî sebrê sîyasetmedaranê Ewropa nêmend. Têna meseleyanê zereyê Tirkîya rê nê meseleya Azerbaycan, Lîbya, Dengizê Sipî, Iraq, Sûrîye ya Tirkîya zî Ewropa kena teng.Coka rexneyê vera Tirkîya do bizêdîyê.  Goreyê mi Meclîsê Parlamenteran ê Konseya Ewropa (MPKE) de destsernayîş û tepiştişê Tirkîya bêrê ercnayene û seba raydayîş bêrê pêşkêşkerdene. Ozsoyî vat: ''Goreyê mi no vernîyaz do bêro qebulkerdene. O çax tedaya rayaumûmîya mîyanneteweyî ya vera Tirkîya do  bizêdîya.''