Weçînayîşanê Amerîka de namzetê Demokratan Joe Biden ser kewt û bi sereko 59. yê Amerîka. Wekîlê HDPyî û Hemvervatoxê Komîsyonê Têkilîyanê Teberî yê HDPyî Hişyar Ozsoyî derheqê babete de ANFyî rê qisey kerd.

Ozsoyî îfade kerd ke Donald Trump 4 serran de dezgehê Amerîka bi giranî vila kerdî, têkilîyanê dinya de zehmetîye ante,  bi taybetî Ewropa de lîderêk/e nêverda û tede nîqaş kerd.

Ozsoyî vat: ''Trump Tirkîya reyde têkilîya dostanîya şexsî kerdêne. Mîsal Trumpî Erdoganî reyde xîret kerdêne ke têkilîya şexsî bikero. Na rewşe Bidenî ra dima do biqeda û verê dîplomasîya sazûmanî ya Amerîka do bêro akerdene. Nê wextî de Wezaretê Karanê Teberî, Pentagon, Konseya Asayîşî yo Neteweyî do xurtêr bibê. Xora na rewşe do tesîrê Tirkîya zî bikera. Hînî hetê bînî yê telefonî de lîderêk/e çin o/a ke Erdogan bieşko ci manîpule bikero. Erdoganî tim vatêne 'dostê mi Trump, dostê mi Putin' û bi nê hawayî sîyaset kerdêne.''

Ozsoyî ard ziwan ke Tirkîya aktorêka girînge ya herêm a, hêzêkê NATOyî ya, endama Konseya Ewropa ya û bazarêko girîng ê ekonomî ya. Ozsoyî vat: ''Şaş o ke merdim vajo Biden ameyo û do vera Erdoganî şer bikero.Xora tarîx de rîpelo neweho abeno. Biden do giranîye bido kanalanê dîplomatîkan ser. La mabênê Tirkîya û Amerîka de meseleyê giranî yê bingeyînî virazîyayî û nê do bi asanî çareser nêbê. Babeta S-400, dewaya Halk Bank, polîtîkaya Amerîka ya Sûrîye meseleyanê winasênan de mabênê wird terefan de nakokîye do biqewima.''

Ozsoyî kurdan rê  nêzdîbîyayîşê Bidenî zî ercna û vat: ''Biden meseleya kurdan şinasneno, Îdareyê Herêmî yê Kurdîstanî û sîyasetmedaranê ci reyde têkilîya ci ya nêzdîye esta. Wexto ke Biden hetkarê serekî bi Amerîka Kobanê war verda û kurdan reyde vera DAÎŞî îtîfaq kerd. Biden do kurdan û Tirkîya seba pêkerdiş û nêzdîbîyayîşan teşwîq bikero. La wa çew Bidenî ra zaf çi mepawo. Biden wextê Obamayî de 8 serran hetkarê serekî bi û o çax kurdan reyde têkilîyê Amerîka zaf xirab bîyî.''