Wêranşarê Riha de hetê KCD û DBPyî ra çarçewa Kampayanya Wextê Azadîye yo de têhetameyîşê şarî ame kerdene. Têhêtameyîşo ke banê HDPyî yê qeza de ame kerdene de îdarekarê KCD û DBPyî, wekîlê HDPyî yê Riha, endamê Meclîsê Mayanê Haştîye û xeylêk kesî tewrê ci bîyî.

Hemserekê Pêroyî yê KCDyî Berdan Ozturkî tîya qisey kerd, bale ante ser ke sîstemê dewlete wazeno kurdan çîn bikero û vat: ''Têna tîya nê çar leteyanê Kurdîstan de polîtîkayanê çînkerdişê kurdan yenê rayraberdene. Raştîya bine zî aya ke kurdî çirey nê cehenemî qebul nêkenê û tim semedê wayrîvejîyayîşê heqanê xo payan ser ê. Ma bedê pîlî dayî hema zî danê. Ma çirey milê xo çewt nêkerd, tim semedê azadîye xover danê.''

Ozturkî tezkereyê Iraq û Sûrîye ke meclîs de ame qebulkerdene o zî sey leteyêkê îmha û înkarê kurdan hesibna û vat: ''5ê nîsan a 2015î ra nata vera Rayberê PKKyî Abdullah Ocalanî tecrîd yeno girankerdene. Seba ke Ocalan cuyeyêka altenatîfe teqdîm keno wazenê vengê ci bibirnê. Nêwazenê ke fikrê ey Tirkîya û Rojhelatê Mîyanênî ra vila bê. Ma hukmatanê verênan ra zî zaf zulm dî la çewî hendê nê îqtîdarî nêkerd. Başûr de çeka kîmyewîye şuxulnenê. Ewro Kurdîstanê Federe de şero bêqeyde yeno kerdene. Berpirîsyarê nê têna Tirkîya nîya. Amerîka û welatê Ewropa zî bi bêvenîya xo nê hemkarîya nê sûcî kenê.''

Berdan Ozturkî  vat: ''Zîhnîyetê îqtîdarê Erdogan û BahçelîyîSadamî ra zî xirabêr o. Seba ke kurdan rê çok bidê dayenê çiyo ke destê înan ra yeno kenê. Wazenê kurdî ziwan, kultur û herra xo caverdê. Kurdî rixmê heme hêrişan çirê ercê xo canêverdayî û waştişanê xo ra peyser game nêeşte. Meselea tewr pîl meseleya kurdî ya. Heta na mesela çareser nêbo meseleyê bînî yê Tirkîya nêeşkenê bêrê çareserkerdene. Rayîr û medotê çareserî eşkera yê. Ganî birêz Ocalanî dir pêvînayîş bêro kerdene.''

Ozturkî bale ante serê tewirê PDKyî ser û vat: ''Xetaya tewr pîle ewro PDK, hukmatê Başûrî keno.  Êyê ke Vakûr de qirkerdiş kenê nêeşkenê bibê dostê to. No sîstem nêeşkeno bibo dostê Rojawanî. Ma zî şarê kurdî zî zano ke waştişê şima azadîya kurdan nîya şima  sey tim hey menfaatê keye û eşîrê xo dima. Hinî semedê kurdan yew qimetê şima nêmend. Başûr yeno îşxalkerdene. Vera îşxalî şima qet vengê xo nêvejenê. Şima têna vanê 'ez ez ez' kurdî xêmê şima de nîyê. Na xeletîye ra agêrê. Eke şima wina dewam bikerê do peynîya şima zî bêro. Rixmê heme zehmetîyan kurdî do çirey çok nêdê û tewr peynî de ser bikewê.''

Aydenîze: Şima pê mirnayîşî nêeşkenê têkoşînê cinîyan bişiknê

Hemserêka Pêroyî ya  DBPyî Salîha Aydenîz zî vat: ''Peynîya nê sîstemê faşîstî nêzdî ya. Xoverdayîş cinîyan û şarê kurdî do nê sîstemî birijno. Sîstemo ke heme şaran û cînsan û nasnameyan nêgeno zerrîya xo çînbîyayîşî ro mehkum o. Modernîteya demokratîke vera nê sîstemî yew alternatîf a. Ewro Rojawan de serkêşîya cinîyan de sîstemo alternatîf semedê heme dinya nimûne yo. Ma ewro serrgêra xelisnayîşê Tirkîya de vanê ke ganî komara demokratîke bêro ronayene. Ganî pê qanûnan heqê şaran bidîyê ci ke heme şarî bi renganê xo xo îfade bikerê.''

Aydenîze cezaya 30 a ke dîyaye Vervatoxa TJA Ayşe Gokan a zî vist vîrî û vat: ''Pê destbendkerdiş û tepiştişan wazenê xoverdayîşê cinîyan bişiknê. Wazenê têkoşînê cinîyan bifatisnê. La ê se kenê wa bikerê do ser nêkewê. Cinîyî semedê pîlkerdişê têkoşînî mergî genê çim. Ma zî înan ra hêz genê. Qerarê ke vera embazanê ma yê ke rehîn ê yenê girewtene dişmenîya vera cinîyan a. Ma zî vera naye vanê ke şima pê mirnayîşî nêeşkenê têkoşînê cinîyan bişiknê. Ma do kuçeyan camêverdê. Ma do vera nê sîstemî têkoşînê xo pîlêr bikerê.''

.