Serekê Pêroyî yê Partîya Têgêrayîşê Kedkarî (EHP) Hakan Ozturko ke partîya ci endamêka Îtîfaqê Kede û Azadîye ya, derheqê weçînayîşanê gulane, meseleya kurdan û xebatanê îtîfaqî de ANFyî rê qisey kerd.

Ozturkî bale ante ser ke rejîmê AKP-MHPyî krîzê ekonomîkî pîlêr keno, heqê kedkar û karkeran nêdano, meseleya kurdan pê teda nimneno.  Ozturkî pare kerd ke ê do Îtîfaqê Kede û Azadîye reyde xebatanê weçînayîşî bikerê û bibê vengê bindestan û kedkaran.

Oztukî ard ziwan ke ê çareserîya mesleya kurdan de hetê kurdan de yê û seba ke na mesele hetê komelî ra bêra çareserkerdene têkoşîn kenê. Ozturkî vat: ''Seba çareserîya meseleyanê Tirkîya ganî cepheyê demokrasî yo tewr hîra bêro ronayene Seba ke meseleya kurdan bi demokrasî bêra çareserkerdene ganî hêverî ma rejîmo ke pê dişmenîya vera kurdan xo weye keno, bixelisê. No îqtîdar seba ke estbîyayîşê xo rê dewam bikero eşkeno pêro rayîranê gemarinan biceribno.  Ma dewranê verênan ra ders û tecrubeyê pîlî girewtê. Asayîşê sindoqan ma rê zaf girîng o. Ma meverdê ke qet yew raye zayî biba. Ma sey Îtîfaqê Kede û Azadîye do bikerê ke yew hemkarîya têkoşînî awan bikerê. Seba ke ma nê rejîmê tekperestî birijnê, destê ma ra çi yeno do bikerê.''

Ozturkî weçînitoxî hişyar kerd ke vera dek û dolabanê îqtîdarî hişyar bibê. Ozturkî nîqaşê zereyê îtîfaqî vistî vîrî û vat: ''Nîqaşî xora ganî est bê la ganî zerar nêdê îtîfaqî. Îtîfaqê Kede û Azadîye bire daye ke eke partîyî biwazê wa bieşkê nameyê xo ser o bikewê weçînayîşan. Îtîfaqê ma zî partîya ma EHP zî do bikerê ke erkanê xo bîyarê ca. Seba ke ma bingeyê azadîye ronê do têkoşîn bikerê. Ma seba azadîya cinîyan, heqanê kedkar û karkeran, çareserîya meseleya kurdan û qedîyayîşê şerî destê ma ra çi bêro do bikeerê. Ma do têkoşînêkê qerardarî bikerê.''