Paytextê Fransa Paris de seba ke kiştoxê şehîdanê Qirkerdişê Parisî yê 9ê Çeleyê 2013î Sakîne Cansiz, Fîdane Dogan û Leyla Şaylemez û kiştoxê şehîdanê Qirkerdişê Parisî yê 23yê Kanûne Evîne Goyî, Mîr Perwer û Abdurrahman Kizilî bêrê eşkerakerdene, dosyayanê dewaya qirkerdişan ra bira nimnayîşî bêra wedaritene bi des hezaran kesan hêverî ver bi Meydanê Republique rayraşîyayîş kerd.

Rayraşîyayîşê bi des hezaran kurdan û dostanê înan bi slogananê "Bijî Serok Apo", "Sara Rojbin Ronahi", "Jin Jiyan Azadî", "Bijî Berxwedana Gerila", "Şehîd Namirin" dest pêkerd. Dima Meydanê Republique de mîtîng ame kerdene.

Hêverî Hemserekanê CDK-Fyî Xanê Akdogan û Abdullah Ulmezî mîtîng de qisey kerd û pare kerd ke rixmê nê qirkerdişan kurdî do qetî ser bikewê û kurdî pê têkoşînê şehîdan qesasê înan bigêrê.

Vervatoxê Têkilîyanê Teberî yê CDK-Fyî têkilîya Fransa û Tirkîya rexne kerde û vat: ''Dewleta tirke mutefîqa şima nîya. Eke Fransa Qirkerdişê 9ê Çeleyî roşnî bikerdêne no qirkerdişê 23yê Kanûne zî do nêqewimîyayêne. Wextê ci yo ke pêro qirkerdişî bêrê roşnîkerdene. No rûmetê edaletê Fransa yo. Hînî wextê ci ameyo; PKK lîsteya terorî ra vejê.''

Birayê Sakîne Cansiz Metîn Cansizî xîtabê girseyî kerd û vat: ''Şima keyeyê Sakîne yê.''

Kênaya apê Evîne Goyî vat: ''Dewleta tirke û hemkarê ci kenê ma bikişê la ma do verê înan de çok nêşorê erdî ro. Fransa eke dosta kurdan a wa nê qirkerdişan roşnî bikera.''

Nameyê keyeyê Abdurrahman Kizilî ser o Cemal Turanî vat: ''Şarê kurdî eşqê xo yê şerî û haştîye tarîxê xo ra gêno. Dişmenê ma vera kurdan û gerîlayan her xirabîye keno la do ser nêkewo.''

Nameyê keyeyê Mîr Perwerî ser o Musa Alanî vat: ''Senî ke Mîr Perwer rayîrê Hozan Serhedî de şi ma zî do rêçê ey de şorê.''

Nameyê TJK-E ser o Cemîle Renklîçay qisey kerd û vat: ''Evîne Goyî hetê nîjadperestêkî ra nêkişîyaye. No cînayetêko sîyasî yo. Ma sey têgêrayîşê cinîyan ê kurdan têkoşînê xo rê dewam bikerê. Serê dosyaya Qirkerdişê 9ê Çeleyî ra bira sirê dewlete wedarnê.''

Endamê Konseya Rayberdişî ya KCKyî Zubeyîr Aydarî vat: ''Rixmê nê qirkerdişan zî ma qerardar ê ke xo biresnê azadîye. Dewleta tirke hêrişê her cayê Kurdîstanî kena la ma zî do xo ver bidê. Se beno wa bibo ma do edaletî bîyarê welatê xo.''

Hemsereka KCDK-E Fatoşe Goksungur vat: ''Fransa ganî hesabê nê qirkerdişan dewleta tirke ra bipersa. Kurdî zî do hesabê nê qirkerdişan bipersê. Ma do bi Şorişê Cinîyan cewab bidê hêrişanê dewleta tirke.''

Şaredarê Parisî Alexandra Cordebardî zî mîtîng de hîsê xo ardî ziwan û pare kerd ke ê do tim hetê kurdan de yê.