Paytextê Fransa Paris de verê Merkezê Kulturê Kurdan ê Ahmet Kayayî ke Evîne Goyî, Mîr Perwer û Abdurrahman Kizil 23ê kanûne de tîya ameyî qetilkerdene, ra heta Merkezê Enformasyonî yê Kurdîstanî yo ke 9ê çeleyî de Sakîne Canzis, Fîdane Dogan û Leyle Şaylemez ameyî qetilkerdene rêzila merdiman ameye pêardene.

Sereka Şaredarîya Parisî Alexandra Cordebard zî tewrê çalakîye bîye. Cordebarda ke warê destpêkerdişê rayraşîyayîşî de qisey kerd ard ziwan ka dej û hêrsê kurdan pare kena û vat: ''Ma pê têkoşînê cinîyan ê kurdan ê dinya hayîdar ê. Ma zanê ke ma deyndarê kurdan ê. Ma zanê ke xeyrê înan tîya, Fransa, Paris  û Ewropa de hûzûrê ma est o.''

Vervatoxa Tekîlîyanê Teberî yê TJK-E Melîke Yaşar zî vat:  ''Ma verî zî vatbi û reyna vanê, no hêrişêko nîjadperest nîyo. No qirkedişêko polîtîk bi. Seba ke embaza Evîne têkoşîn kerdêne ke wa slogana Jin Jiyan Azadî bêro ciwîyayene ameye qetilkerdene.''

Qiseykerdoxanê bînan zî Sakîne Cansiz, Fîdane Dogan û Leyla Şaylemez zî yad kerdî û vat seba ke qirkerdişo verên nêame roşnîkerdene no qirkerdiş qewimîya û veng da hukmatê Fransa ke wa wird qirkerdişan zî cade safî bikero.