Rixmê raporê Komîteya Vergirewtişê Îşkenceyî ya Konseya Ewropa (CPT) û qerarê Mehkemeya Heqanê Merdiman a Ewropa ( MHME) tecrîdê serê Rayberê Şarê Kurdî Abdullah Ocalanî xorî beno. Komîteya Wezîran a Konseya Ewropa vizêr qerar girewt ke selahîyetdarê tirkî tewr erey heta êlula 2022î ganî derheqê holkerdişê şertanê Îmraliyî de zanayîş bidê.  Endamê Meclîsê Parlamenteran ê Konseya Ewropa (AKPM) Andrej Hunkoyî derheqê tecrîdê Îmraliyî û qerarê peyênî yê Konseya Ewropa de ANFyî rê qisey kerd.

Endamê Partîya Çepe ya Almanya Andrej Hunkoyî vat: ''Goreyê zanayîşê ke resayî mi şertê Zîndanê Îmraliyî zaf xirab ê, qetî goreyê standardanê Pêkerdişê Heqanê Merdiman ê Ewrpa nîyê. Komîteya Wezîran a Konseya Ewropa qerarêko krîtîk girewt. Goreyê nê qerarî seba ke semedê cezaya muebetî ya girane mekanîzmayê cigêrayîşî çîn ê, muemeleyê teberê merdimîye yenê kerdene û ganî Tirkîya de zî mekanîzmayê cigêrayîşî bikewê dewre. Ewro ra tepîya ganî endamê Komîsyonê Ewropa sere de Almanya tekîlîya xo ya taybete ya bi hukmat, polîs, leşker, hukm û îstîhbaratê tirkî biqedîno. Hukmatê almanî nêeşkeno hem vajo dewleta tirke pêkerdişê endamîya Konseya Ewropa binpay kena û hem zî Tirkîya reyde tekîlîya xo bidomno.''

Hunkoyî semedê qerarê Konseya Ewropa keyfweşîya ard ziwan û vat: ''Seba ke ma şirê Îmrali û şertanê Abdullah Ocalanî cade bivînê, ma xeylêk rey muracat kerd la çi heyf ke mekamanê tirkî destûrê naye nêda. Azadîya Ocalanî eşkena pêkewtişê kurdan û tirkan ser o tesîro hole bikero û mesela çareser bikero. No semedê heme hetan bifeyde yo.''