Wekîla Yewîya Xirîstîyanan ê Demokratan, CDA Anne Kuik vernîyazêk dabi parlementoyê Hollanda û vernîyaz de ame vatene ke wa Fermanê 3ê Tebaxa 2014î yê vera êzidîyan ê Şingalî yo ke hetê DAÎŞî ra dîya sey qirkerdiş bêro qebulkerdene.

Vernîyaz de ame parekerdene ke DAÎŞî vera komelê êzidîyan jenosîd kerd, sûcê merdimîye kerdî. Vernîyaz de nê madeyî zî ameyî qebulkerdene.

-Muhakemekerdişê DAÎŞgîran ê Hollanda de ganî vengê qurbananê êzidîyan zî bêro eşnawitene û heqê tazmînatî bêro şinasnayene.

-Seba edaletî, muhakemekerdişê cerganê DAÎŞî herême de bêro kerdene.

-Ganî fonê paştdayîşê bi doman û cinîyan ê êzidîyan bêro zêdînayene.

-Ganî hukmat paştî bido neweraawankerdişê Şingalî.

Roniştişê parlamento de Wezîrê Karanê Teberî Sigrid Kaagî zî paştî da vernîyazî.

Seba ke fermanê 3ê tebaxe warê mîyanneteweyî de sey qirkerdişê êzidîyan bişinasîyo ganî Konseya Asayîşî ya Neteweyanê Yewbîyayeyan de bêro qebulkerdene yan zî hetê Mehkemeya Mîyanneteweyî de bire bêra dayene.