Verba hêrişanê îşxalkarîye yê Dewleta Tirkan 2yê teşrîna peyêne sey Roja Xoverdayîşê Dinya ya seba Rojawanî (World Resistance Day for Rojava) ame parekerdene. Sere de welatanê Ewropa zafê welatan de 2yê teşrîna peyêne de çalakîyê paştdayîşî do bêrê kerdene û îşxalkarîya Dewleta Tirkan do bêra şermezarkerdene.

Yeno pawitene ke bi taybetî Almanya de girseyêko pîl bibo. Têna şaristananê ci de ney, zafê bajarekanê Almanya de zî amadekarîyê seba nawnayîşanê girseyan yenê kerdene. Partîyanê mûxalefetî yê Almanya ra Partîya Çepe beyanateko nuştekî weşana û vat ê do paştdayîşêko xurt bidê nawnayîşanê 2yê teşrîna peyêne.

Beyanat de da zanayene ke  nawnayîşê şemeyî saet 13:00 de Neptunbrunnenî yo ke Alexanderplatz de yo de do dest pê biko, 400 Euro hetkarîye seba mesrafan dayîye. Partîya Çepe heman beyanatî de hukmatê Merkele seba tewrê ci yê verba herişanê îşxalkarîye yê Dewleta Tirkan rexne kerd.

'Almanya Hemparê Sucanê Tirkîya ya'

Partîya Çepe tewirê îdareyê Berlînî sey 'beşerm' da zanayene û Wezîrê Karanê Teberî Heîko Maas zî bi zîyaretê Anqara bîyo hemkarê sucanê Tirkîya. Partîya Çepe eşkera kerd ke hukmato federal tena bi beyanatek hêrişanê Tirkîya rexne keno, la seba ke hêriş biqede gamêka pratîke nêerzeno. Partîya Çepe waşt  ke:

-Seba qedînayîşê îşxalkarîye  ganî Almnaya bi hewayêkê pêtî Tirkîya hişyar biko û çekan nêroşo Tirkîya.

-Endamanê DAÎŞ'î yê ke hemwelatîyê Almanya yê bîyaro Almanya û hukm biko.

-Garantîya Hermesî ya seba şîrketanê Almanî ya ke Tirkîya de kar kenê û hetkarîya ke seba endamîya Tirkîya ya Yewîya Ewropa yena dayene, wa bêro wedaritene.

-Sîyaseto ke  sembolanê Kurdî krîmînalîze keno, wa bêro qedînayene. Ganî destûr bibo ke alayê YPG-YPJ'yî bêrê kiriştene û PKKyî ser o qedexe bêro wedaritene.