Serekê Herêma Vestfolî û Telemarkî ya Partîya Çepe ya Sosyalîste (SV) Grete Woldî meqaleya xo ya ke rojnameyê Tonsbergs Baldî de weşanîyaye de, îfade kerd ke welatê ey ganî têna hêrişanê Tirkîya şermezar nêkero, seba vindarnayîşê  hêrişan zî gama rastikêne bierzo.

Woldî pare kerd ke YPG/YPJyî û Hêzanê Sûrîya Demokratîke bi hetkarîya DYA û welatanê rojawanî DAÎŞ çin kerd û Rojawan de sîstemêko têdûştîye ame sazkerdene.Woldî ard ziwan ke hêzê Kurdan kampan de ca da 11 hezar DAÎŞijî û 75 hezar keyeyê înan labelê destpêkê hêrişanê Tirkîya de bi hezaran DAÎŞijî remayî. Dima ke DYA hêzê xo tepîya antî Tirkîya vera kurdan dest pê hêrişî kerd.Woldî vat ke kurdan şerê vera DAÎŞî de vîndîyê giranî dayî û rexne kerd ke seba ke hêrişê vera kurdan bêrê vindertene, tedbîrê rastikênî nênê girewtene. Zaf welatî hêrişan şermezar kenê labelê no têna bes nîyo.

Woldî waştişê xo wina îfade kerdî: Partîya Çepe Sosyalîste ya Vestfold Telemarkî dezgehanê Norweçî ra wazena ke nêrazîbîyayîşê xo bi hawayêkê pêtî bimojnê û çekan nêroşê Tirkîya.  Ganî îdareyê kurdan bêro naskerdene û înan reyde têkilîya dîplomatîke bêra caardene. Eke hêrişî dewam bikê ganî Norweç seba Tirkîya ambargoyê ekonomîkî bîyaro ca. Ganî NATO, Neteweyê Yewbîyayeyî û Konseya Ewropa tedayê Tirkîya bikê ke vera kurdan polîtîkayê xo bivurna. Seba Vakurê Sûrîye ganî ma hetkarîya ekonomîke, dermanî û weşîye bikê. Ganî ma paşt bidê kurdan û ma Tirkîya ra biwazê ke vera Vakur û Rojhelatê Sûrîye hêrişanê xo bivindarna. 11 parlamenterê Partîya Çepe ya Sosyalîste parlamento de estî.