Endamê Konseya Rayberdişî ya KCKyî Mustafa Karasuyî bernameyêkê taybetî yê Medya-Haber TVyî de rojdem ercna. Qiseykerdişê Karasuyî ra tay noqtayê girîngî wina yê:

''23yê teşrîna peyêne de Rayber Apo de pêvînayîş ame kerdene. Rayber Apoyî tîya de vat ke tecrîdê vera Rayber Apoyî dewam keno. Nika yeno vatene ke mabênê DEM Partî û Rayber Apoyî de pêvînayîşêk do bêro eyakerdene. Rayber Apoyî rê yeno ferzkerdene ke PKKyî tasfîye bikero. La nê prosesî de HTŞyî û cerganê bînan hêrişê Sûrîye kerd, Heleb destî ra şi coka pêvînayîşê bi Rayber Apoyî ame taloqkerdene. Çunke dewlete nêwazena ke Rayber Apo seba Sûrîye û Rojawanî çîyêkî vajo. 

Îmrali de şero taybet û tecrîd dewam keno. Coka wa çew têkoşînê vera tecrîdî şenik nêkero. Rayber Apoyî ra yeno waştene ke wa PKKyî tasfîye bikero. La dewlete bedelê ney de gamêke nêerzena. Yanî Rayber Apo binê îşkence û şantajî de yo. Wa kurdî û dostê ma bizanê ke heta ke tecrîd nêro wedaritene armancê pêro pêvînayîşan şantaj o. Ganî ma seba azadîya Rayber Apoyî têkoşînî rê dewam bikerê. 

Eke heyetê DEM Partî zî şoro Îmraliyî ganî nê xususan rê dîqat bikero; ganî bizano ke armancê dewleta tirke çita yo. Wina yeno mojnayene ke seke prosesêkê çareserîye est o. Şa çîyo winayên çin o. Seba çareserîya meseleya kurdan gamê zelalî ganî bierzîyê. Oyo ke nika yeno qewimîyeno konseptê tasfîye yo. Dewleta tirke çîyêkî nêdana kurdan la tasfîyeya PKKyî wazena. Wina nêbeno. Rayber Apo sermuxatab o.

Heman şantaj û gefî bi rayîrê qeyûman vera DEM Partî zî yenê kerdene. DEM Partî vana ke ê partîya Tirkîya yê la dewlete wazena ke DEM Partî wa polîtîkayanê tekperestan qebul bikera. Aseno ke polîtîkayê qeyûman sey hacetêkê şantajî do dewam bikerê. Vera nê polîtîkayan xeta şarê Wanî xeta raşte ya. Şarê Dêrsimî zî vera qeyûman tewirêko raşt mojna.

Ganî şarê ma wayîrê şaredarîyanê xo vejîyo. Qeyûmî hêrişê ziwan, kultur û nasnameyê kurdan kenê. Ganî têkoşînê vera qeyûman bi cidîyetî bêro kerdene. Ganî têkoşînê vera qeyûman, têkoşînê vera tecrîdî, têkoşînê seba Rojawanî û têkoşînê vera tedeyan pîya bêrê kerdene.

Herêmanê Pawitişî yê Medya de şer bi giranî dewam keno. Dewleta tirke bi destekê PDKyî kewta tay cayan. Xora destekê PDKyî ra nêbîyêne rewî ra dewleta tirke do bin kewtêne. Şer do wina bi çetinî dewam bikero. Her ke dewleta tirke îşxalê xo xorin bikera gerîlayî zî têkoşînî do xurtêr bikerê. Gerîlayî hêzê fedayî yê û tecrubeyê înan ê şerî yê 50 serrî est ê.

Merkezê Şerê Dinya yê 3inî Rojhelato Mîyanên o. Seba ke asayîşê Îsraîlî bêro caardene no şer yeno kerdene. Rejîmê Sûrîye çira rijîya? Seba ke Hîzbullahî hêrişê Îsraîlî kerd, Îsraîlî hêrişê Îranî yanî Rûsya kerd. Bi nê hawayî Sûrîye zî qels bîye.

Dewleta tirke senî ke paştî dana DAÎŞî paştî dana HTŞ û OSOyî zî. Xora HTŞ û OSO cerganê DAÎŞî ra yenê pê. Sûrîye do muhtaca HTŞyî bimana. La Îsraîl HTŞyî seba xo sey tehlukeyî vîneno. 

Şêx Meqsûd de kurdî hema zî vera HTŞyî xo ver danê. Hêrişê vera Sûrîye do hemsengîyan bivurnê. Dewleta tirke paştî dana HTŞ û OSOyî la nê do bibê belayê sereyê ey. Îsraîl do ney qebul nêkero. Erdogan seba ke kurdî tira fayde nêvînê hêrişê Sûrîye keno. Yanî dewleta tirke seba ke destkewteyanê kurdan çin bikera paştî dana nê cerganê cîhadîstan. 

Dewleta tirke wazena ke kurdan bi temamî çin bikera. Nê hêrişî bi destê dewleta tirke do vera Îdareyê Xoserî bêrê kerdene. Şarê Rojawanî zî zaneno ke dewleta tirke dişmena Îdareyê Xoserî yo. Coka ma bawer ê ke şarê ma amade bi.

Cergê HTŞ û OSOyî dişmenê azadîye yê. Şarê ma cara vera DAÎŞî azadîye pawitbî. Ma wina bawer kenê ke vera nê cergan zî şarê ma do azadîya xo bipawê. Rojawan qelbê pêro Kurdîstanî yo. 

Pêro parçeyanê Kurdîstanî ra şehîdê Rojawanî est ê. Coka ganî Rojawan teyna nêro verdayene û paştî bêra dayene ci. Ganî pêro kurdî seba Rojawanî wurzê payan ser, ruhê Kobanê ancî bimojnê. Ma venga pêro kurdan û dormeyanê demokratîkan da ke seba pawitişê Rojawanî têbigêrê. Pawitişê Rojawanî pawitişê pêro Kurdîstanî yo. 

Hêzê mîyanneteweyîyî seba menfaetanê xo ancî verê hêrişanê serê kurdan de bêveng ê. Rojawan de ancî bi hezaran merdimî bîyê koçber û binê hêrişan de yê. Şarê Şêx Meqsûdî yê Helebî binê ablûqa de yo la xo ver dano. Şarê Rojawanî mîyanê xoverdayîşî de yo. 

Demokrasî û azadîye ancax bi têkoşînî do bêrê destvistene.Kurdan vera DAÎŞî xo ver da, şehîdî dayî la ser kewtî. Dinya deyndara kurdan a. Coka wa her kes bi mesuldarî vera hêrişanê serê Rojawanî têbigêro.''