Temsîlkaro Taybet ê Neteweyê Yewbîyayeyî yê seba Sûrîye Geîr O. Pedersen seba ke derheqê pêvînayîşanê Komîteya Destûrê Bingeyênî yê Sûrîye û kare ci reyde xeberan rayaumûmîye rê biresne Ofîsê Neteweyê Yewbîyayeyî yê Cenevre de çapemenîye rê qisey kerd.

Pedersenî pare kerd ke Komîteya Destûro Bingeyî ya ke 130 kesan ra yena meydan, yena Cenevre û kombîyayîşê qanûno bingeyî do 30'ê Teşrîna Verêne de Ofîsê Cenevre yê Neteweyê Yewbîyayeyî de bi hewayêkê resmî dest pê bikê. 

Pedersenî vat: "Peymana sazkerdişê Komîteya Qanûno Bingeyî peymanêka sîyasî ya mabênê rejîmê Sûrîye û mûxalîfan de a." û îfade kerd ke mûxalîfî  û rejîmî do rî bi rî pêvînayîşan bikê. Kombîyayîşê komîteya qanûno bingeyî beno ke seba amayoxê Sûrîye gamêka newîye bibo."

Pedersenî da zanayene ke karê qanûno bingeyî yo newe seba şarê Sûrîye hêvîyêk o û veradayîşê merdimanê ke sey esîr ameyî girewtene, qerardayîşê aqibetê merdimanê ke ameyî remnayene, do seba nê prosesî girîng bibo.

Pedersenî ard ziwan ke karê Qanûno Bingeyî do bingeyê hukmatê nîzamnameyê Neteweyê Yewbîyayeyî yê derheqê Sûrîye de do bêro xebitnayene û vat: "Krîtro bingeyî yê Qanûno Bingeyî yo newe do pawitişê bandurîye, yewîya erdê Sûrîye û xoserîya Sûrîye bibê. Neteweyê Yewbîyayeyî seba asankerdişê nê prosesî û pawitişê prosesî do mîyanê nê karî de bibe. Qerarê endamanê komîteya qanûno bingeyî do bi hewayêkê yewreyî yan zî se ra 75 yê endaman ra bêrê girewtene. Heta ke hetî pê nêkerî, qerarêk do nêro girewtene."

Temsîlkaro Taybet Pedersenî seba persê rojnamegerêko ke persa va 'Kurdî yan zî QSD'yî do mîyanê komîteye de bibê yan?' vat, "Mîyanê na komîte de Kurdî estî, labelê babeta nêbîyayîşê temsîlkarêkî Hêzanê Sûrîye ya Demokratîke de şima heqdar ê."

Serra 2011 ra nata Cenevre de û zafê cayanê bînan de bê tewrbîyayîşê Kurdan pêvînayîşî ameyî kerdene, înan ra yewêk ser nêkewt.