Konseya Asayîşî ya Neteweyanê Yewbîyayeyan (KENY) seba ercnayîşê rewşa Îdlîbî bi hawayêkê lezabezî kom bîye. Temsîlkaro Taybet ê Neteweyanê Yewbîyayeyan ê Sûrîye Geîr Pedersenî bi konferansê vîdeoyî tewrê kombîyayîşî bi û ey bale ante serebutanê Îdlîbî ser û seba çareserîyanê meseleyan veng da ke bi şertê esasvînayîşê serwerîya Sûrîya hemkarîya mîyanneteweyî bi hawayekê lezabeze bêra caardene.

Pedersenî vat: ''Îdlîb de zaf sivîlî ameyî kiştene û zaf sivîlî zî neçare mendî ke koç bikerê. Rêxistina terorî ya Heyet Tehrîr El Şam (HTŞ) û komê muxalîfî yê çekdarî vera cayanê sivîlan hêrişanê giranan kenê. Vera merkezanê leşkerî yê Rûsya zî hêrişî ameyî kerdene. 3ê sibate de hêzê hukmatî yê Sûrîye da qereqolê çimdarîye yê tirkan ro. Goreyê selahîyetdaranê tirkan 7 leşkerî ameyî kiştene. Dima hêzanê tirkan hêrişê zaf noqtayan kerd.''

Pedersîn adirbirnayîşê bi mabênçîya tirk-rûsî vist vîrî û vat: ''Kifş o ke adirbirnayîş bo zî şerê Îdlîbî ho giranêr beno.''

Pedersenî bale ante ser ke Îdlîb bi merkezê HTŞyî ke hetê Konseya Asayîşî ra sey rêxistina terorî yeno dîyene û vat: ''Estbîyayîşê nê koman ê Îdlîbî nêno qebulkerdene. Estbîyayîşê înan seba asayîşê Sûrîye, asayîşê herême û asayîşê mîyanneteweyî tehlukeyêko pîl o.''

Pedersenî ard ziwan ke beno ke mabênê Sûrîye û Tirkîya de şer do biqewimo û vat: ''No şer seba sivîlan netîceya xirabe do bîyaro û bibo semed ke şerwanê xerîbî yê terorîstî vila bibê û gefanê neweyan biwanê.''

Pedersenî îfade kerd ke bi hemkarîya mîyanneteweyî yê bingeyê hurmetê serwerîya Sûrîye meseleya Îdlîbî çareser bena û vat: ''Ganî meseleya şerwanan ê terorîstan ê xerîban bi hawayêkê hîrayî bêra ercnayene. Îdlîb de paştdayîşê seba komanê terorîstan ganî hîna zêdêr bêro astengkerdene.''