Kurdîstan de  vera hêrişanê dewleta tirke û hemkarîya PDKyî ya bi Tirkîya nêrazîbîyayîşî zêdîyenê. Xeylêk pêşmergeyanê Vakurê Kurdîstanî yê ke 1978 de vera rejîmê Saddam Huseyînî şer kerd, şerêkê zereyê kurdan red kerd. Derheqê babete de Pêşmergeyê verênî yê YNKyî Cewdet Sezgîn (63)o ke Colemêrg de bi serran vera Saddamî şer kerd ANFyî rê qisey kerd.

Sezgînî ard ziwan ke 1978 de Colemêrgî de xeylêk kesan vera rejîmê Saddamî pêşmergetîye kerde û vat: ''Mi wextêk pawitoxîya Mam Celalî kerde. Ez yewinanê 1,2 û 3. de bîya. Erdê Kurdîstanî aîdê pêro kurdan o. Kurdîstan pê peymana Sykes-Picotî ame parçekerdene. Serdestî nika zî wazenê ma bikerê hezar parçeyan. Kurdî ney qebul nêkenê. 1978 de hewceyê way û birayanê mi bi ma estbî coka ma sînorî ra derbaz kerd û şîyî hetkarîya înan. Ma qetî way û birayanê xo rê bêbextîye nêkerde û hetê dişmenî de ca nêgirewt. Bi hezaran pêşmergeyê YNK û PDKyî Vakur de  o çax estbîyî. La çewî ma rê nêvat çi gureyê şima tîya de esto. Eke PDK ewro payan ser o xeyrê Vakurî ra yo. Wa Mesûd Barzanî ney xo vîr a nêkero.

Kurdî ganî xo birakujî ra dûrî bigêrê û meseleyanê xo pê dîyalogan çareser bikerê. Ez sey pêşmergeyêkê verênî birakujî red kena û kam birakûjî vejo wa kurdî ey efû nêkerê. Eke Başûr de birakujî biqewimîya mesuldarê ci PDK û keyeyê Barzanîyî yo.''

Cewdet Sezgînî bale ante birakujîya mabênê PDK û YNKyî ser û vat: ''1978 de rayberîya Elî Eskerî, Dr. Xalîd û Şêx Huseyînî de komêka 700 pêşmergeyan wexto ke sînorê Şemzînanî ra derbaz kerdêne PDKyî nê kesî şehîd kerdî. Ez zî birîndar bîya. Ez veng dana û hewar kena ke wa birakûjî nêba. Hema zî birînê ê şerê birakûjî nêameyî dermankerdene. 

Vakur de kurdan yewîya xo awan kerde, têna PDK tewrê yewîye nêbi. Semedo ke waştişê Barzanîyî nêameyî caardene ey masaya yewîye rijnaye. Ganî PDK nê ferasetî ra fek vera bido. Wa pêşmergeyî hol bizanê ke dişmenê înan kam ê. Wa PDK pê kayê dişmenî mexapîyo û bîyaro xo vîrî ke kamî wextê DAÎŞî de paştî daye înan kamî nêdaye.''