Hemserekîya Meclîsê Şingalî ya Teberê Welatî (MŞD) derheqê Endamê Konseya Fermandarîye ya HPGyî û Fermandarê Herêma Botanî Egîd Civyanî de û derheqê pêkerdişê Bexdad-Hewlêrî yê Şingalî de eşkerayîyêke daye.

Eşkerayîya MŞDyî wina ya:

''Sere de keyeyê Egîdî ma pêro şarê Kurdîstanî rê serweşîye wazenê. Fermandar Egîdî bi têkoşînê çêrî Şingal DAÎŞî ra xelisna. Şexsê Mam Zekî Şengalî û embaz Egîdî de ma pêro şehîdanê Êzidxan û Kurdîstanî bi rêzdarî yad kenê.

Îdareyanê Bexdad û Hewlêrî 9ê teşrîna verêne de bi peymanêke Şingalî ser o pêkerd. Na peymane şerm a û vera estbîyayîşê êzidîyan a. Wexto ke DAÎŞî hêrişê Şingalî kerd hêzê PDKyî remayî la hêzanê YBŞ, YJŞ, Asayîşê Êzidxanî û êzidîyan bedelê giranî dayî. La PDK û Bexdadî bê xebera êzidîyan Şingalî ser o pêkerd. 

Êyê ke eşkenê Şingalî ser o biran bidê dezgeh û sazgehê Şingalî ye. Coka ganî seba ameyoxê Şingalî Meclîsê Xoserîya Demokratîke ya Şingalî reyde pêvînayîşî bêrê kerdene. Na peymana ke estbîyayîşê êzidîyan binpay kena, qet nêna qebulkerdene.

Ma do bi pêro hêzê xo vera sîyasetê gemarinî yê vera Şingalî têbigêrê. Neteweyê Yewbîyayeyî zî herinda ke Qirkerdişê Şingalî şinasnê û cigêrayîş bikerê beranê felaketan ê neweyan akenê. Ganî no tewir bêro raştkerdene û statuyê Şingalî bêro şinasnayene.

Ma venga pêro êzidîyan danê ke bi yewîya xo Êzidxanêkê xoserî awan bikerê, seba naye berpirsîyarîya xo bîyarê ca û heta ke na peymane bêra vurnayenen û statuyê Şingalî bêro qebulkerdene vejîyê meydanan.''