Gerîlayê Azadîye yê Kurdîstanî seba azadîya şarê xo têkoşîn kenê. Coka ê pawitoxê şarê xo yê. Rixmê hêrişanê artêşa tirke ya îşxalkere zî gerîlayî cewabanê hewceyan danê.

Merdim eşkeno vajo ke şerê nikayênî de dewleta tirke çita ra  paştî gêna; hêzê hegemonya yê teknîkî, xayînê sey keyeyê Barzanîyan û qoricî-kontrayî.

Operasyonanê vera Başûrê Kurdîstanî dewleta tirke teng kerde. Coka dewleta tirke bi qoricîyan hêrişê gerîlayan kena. Dewleta tirke bi nê hawayî kena ke kurdan bi destê kurdanê bînan bikişa û têgêrayîşê azadîye çin bikera. Têgêrayîşê Azadîye bêmabên qoricîyan hişyar keno ke tewrê operasyonan nêbê û guneyê gonîya domananê kurdan nêgêrê xo milî. Nê şerî de waranê gerîlayan de tayê qoricîyî leşkeranê dewleta tirke ra zafêr hêrişê gerîlayan kenê. Nê qoricîyê ke seba panc qurişan vera gerîlayan şer kenê şeref û rûmetê xo zî kenê binê lingan.

Nika sere de Zap û Metîna pêro waran de şerêko çetin est o. Nê şerî de gerîlayî qederê şarê xo dîyar kenê. Merdim eşkeno tengbîyayîşê dewleta tirke bivîno. 

Hîrê serrî yo Herêmanê Pawitişî yê Medya de dewleta tirke metodêk nêverda ke vera gerîlayan şuxilnayo. Rixmê hişyarîyanê gerîlayan zî qoricîyî Zap û Metîna de tewrê operasyonan benê û şinê serê çeperanê gerîlayan. Qoricîyî bi kincanê leşkeranê tirkan waranê Başûrî ra gêrenê. Gerîlayî qestî ra qoricîyan hedef nêkenê la qoricîyî xo kenê hedefê gerîlayan. 

Qoricîyê bi nameyê Necmettîn Menteşo ke Bedlîsî ra yo çalakîyanê gerîlayan de birîndar beno û nêweşxane de lingêkê xo ra beno. Ancî Metîna û Zap de 3 qoricîyê ke Hezexî ra yê, benê hedefê gerîlayan û yenê cezakerdene. Dewleta tirke vernî ra nê qoricîyan şawena, kena hedefê gerîlayan.

Dewleta tirke mergê nê qoricîyan zî rayaumûmîye ra nimnena. Yanî qîmetê nînan seba dewleta tirke çin o. Qoricîyê ke hetê dewleta tirke ra xapîyenê vera gerîlayan şer kenê coka seba gerîlayan mabênê qoricîyan û leşkeran de ferqêk çin o. Êyê ke bi kincanê leşkeranê tirkan erzenê çeperanê gerîlayan û vera destkewteyanê şarê xo çekan ancenê dişmenê gerîlayan ê.