Bado ke Wezîrê Karanê Zereyî yê Tirkîya Suleyman Soyluyî HDP sey hedef mojna, Serdozgerîya Komare ya Şirnexî kewt dewre. Banê HDPyî yê Cizîre ame sereştene û sereştişê keyeyan de xeylêk kesî ameyî destbendkerdene.

Polîsanê ke berê banê HDPyî şikitî tede bi saetan cigêrayîş kerd û serûbin kerd. Posterê Mehmet Tunç, Asya Yuksel, Dayîke Taybet, Sevê Demîr, Pakîze Nayir û Fatma Uyar ê ke dêsan de aliqnayeyî bî û flamayê MEBYA-DERî pê aletanê birnayîşî ameyî dirnayene. Reyna tay meteryalê dîjîtalî, fotograf, flama û rojnameyê sey Yenî Yaşan û Xwebun ameyî dest sernayene.

Bi hewayêkê hemwextî merkezê Şirnexî, Silopî û Cizîre de polîsan eşt xeylêk keyeyan ser.  Cizîre de Hemserekê MEBYA-DERî Serhat Kuçuk, îdarekarê HDPyî yê Cizîre Naim Inedî, Botan Em û hemwelatîyî Asya Aslan, Mela Kasim Yigît, Alî Tunç, Azîz Uygur, Zîndan Mulu, Velî Ekren, Dîyar Olmez ameyî destbendkerdene. Silopî de zî Delîl Urkek, Tuncay Înal û Nadir Onuk ameyî destbenkderden. Merkezê Şirnexî de kesê ke ameyêne cigêrayene keyeyanê înan de nêameyî vînayene, coka nêameyî destbendkerdene.

Hemsereka HDPyî ya Cizîre Zîlane Ecevît vera hêrişî hersê xo ard ziwan û vat: ''Gama ke ma ameyê bane partî heme bêrê ma ameybî şiknayene. Zereyê binîna de rixmo ke berî akerde bî ê zî şikitî. Nê hêrişî de ma reyna dişmenîya înan dîye.'' Ewro do saeta 13:00 de verê banê HDPyî yê Cizîre de çalakîya protestokerdişî bêro kerdene.