Polîsan eşt rêxistina HDPyî ya qezaya Kartalî ya Îstanbulî ser. Sereştiş de bi saetan cigêrayîş ame kerdene û dest nîya fotografanê şehîdan û kovaranê sey Modernîteya Demokratîke û Jîneolojî ser. Badê hêrişî partîyijî û xelêk kesî verê banê partîye de ameyî têhet û bi slogana ''HDP şar o, şar tîya de yo'' hêriş protesto kerd.

Verê banê HDPyî yê Îstanbulî de eşkerayîyêke ameye dayene.  Îdarekarê ESP, SODAP, EMEP, TÎPî û xeylêk kesî tewrê eşkerayîye bîyî.

Hemsereka HDPyî ya Kartalî Aygule Sincar Karataş qisey kerd. Karataşe vist vîrî ke Newroze senî biheybet ameye pîrozkerdene û vat seba ke şar Newroze de wayîrê HDPyî vejîya, bêtehamulîye ra hêriş kenê.

Hemserekê Qeza Mete Aşanî zî bale ante hêrişê vera kurdan ser û vat HDP hêvîya şarî yo û rixmê heme hêrişan do çirey peyser gam nêerzo.

Heserekê HDPyî yê Îstanbulî Ferhat Encuyî zî vat: "Seba ke Newroze biheybet ameye pîrozkerdene no hêriş ame kerdene. Newroze bi coşî ameye pîrozkerdene û şarî îradeyê xo reyna ramojna. Coka tayî nê qebûl nêkenê û hêrişê ma kenê. Şarê kurdê ke seserrî yo yeno eciqnayene û qirkerdene têkoşîno heqdar rayra beno. Şima nêeşkenê verê nê têkoşînî bîgêrê.''