Mayanê Şemeyî yê ke gêrenê merdimanê xo yê ke hetê dewlete ra ameyî vînîkerdene, waşt hewteyê 900. de çalakîya xo mekanê xo Meydanê Galatasarayî de bikerê. Polîsan hêrişê mayan kerd û xeylêk mayî destbend kerdî.

Hemserekê Pêroyî yê ÎHDyî Erene Keskîn û Ozturk Turkdogan, Wekîlê HDPyî Zuleyha Gulum, Oya Ersoy, Zeynel Ozen, Wekîlê TÎPî Ameht Şik û  Wekîlê CHPyî Alî Şeker û lajê Hrant Dînkî Arat Dînk zî tewrê çalakîye bîyî.

Êyê ke merdimê înan hetê dewlete ra ameyî vînîkerdene rixmê heme astenkerdişê polîsan ver bi Galatasarayî rayra şîyî. Polîsan ê girewtî binê ablûqa û dima ra hemserekê ÎHDyî zî tede xeylêk kesî pê kelemçeyanê peykîyan destbend kerdî. Wekîlî vera na neheqîye vejîyayî. Mabenê polîsan  û wekîlan de demo kilm pêrodayîş vejîya. Kênaya Fehîm Tosunî Besna Tosun vat êyê ke mayan û meydanan ra tersenê sey Şîlî do Tirkîya de zî vîn bikerê.

Eşkerayîye bi nameyê mayan hetê wekîle Zuleyha Gulum ra ameye wendene. Gulume Meydanê Galatasarayî sey mekanê vîrî name kerd û vat ê do çirey nê meydanî cameverde. Zuleyha Gulum vat: ''Pê zext û destbendkerdişî wazenê ma bitersnê la înanê ke sînayeyê xo vînî kerdî qet çîyêkî ra nêtersenê. Çunke dejo ke ê ancenê ey dejî ra pîlêr dej çîn o. Ma do çirey peyser game meerzê. înanê ke ewladê ma vînî kerdî wa hesab bidê. Şima se kenê bikerê, ma waştişê xo canêverdenê.''

Ozturk Turkdogan, Erene Keskîn, Gulserene Yolerî, Masîde Ocak, Besna Tosun, Jîyane Tosun, Hasan Karakoç, Îkbal Erek, Hanîfe Yildiz, Mîkaîk Kirbayîr, Alî Ocak, Arat Dînk ê ke ameyî destbendkerdene ameyî berdene Mudirîya Asayîşî ya Îstanbulî.