Nêrazîbîyayîşê vera destbendkerdişê  Sereka TTByî Şebneme Korur Fîncanci û 11 rojnamegeran zêdîyenê. Platformê 'Cinîyî Pîya Bihêz ê' waşt ke Kadikoyê Îstanbulî de verê Operaya Sureyya de eşkerayîye bido la polîsan hêrişê înan kerd.

Polîsan dormeyê Opera girewt û vat ke qedexeyê Qeymeqamîya Kadikoyî ra ê do nêverdê çalakîye bêra kerdene. Bi seyan polîsan dormeyê cinîyan girewt û rojnamegerî zî warî ra dûr kerdî. Cinîyê ke bi îşkenceyî ameyî destbendkerdene, înan sloganê 'Şebneme Korur Fîncanci rûmetê ma ya' berz kerd.

Dima polîsan cinîyî derb kerdî. Merdimanê dormeyî zî vera şîdetê polîsan nêrazîbîyayîşê xo mojna.

Polîsan Vervatoxa Partîya Azadîya Komelkîye (TOP) Perîhane Koca zî tede nêzdîyê 15 cinîyî destbend kerdî û ameyî berdene bi Mudirîya Asayîşî ya Vatanî.

Cinîyan ra dima Platformê Kede, Haştîye û Demokrasî zî waşt çalakîyêke bikerê la polîsan reyna xîret kerd ke çalakîye asteng bikerê. Naye ser o girseyî vat: ''Welatêk de faşîzm est bo, qedexe, tepiştiş, qetilkerdişê karkeran est bê xoverdayîş heq o.'' 

Polîsan tîya de zî rojnamegerî zî tede xeylêk kesî bi îşkenceyî destbend kerdî û rojnamegerê bînî zî bi derbkerdişî warî ra dûrî vistî.