Nobeta Edaletî ya keyeyanê tepişteyanê nêweşan û tepişteyanê ke înfazê înan ame vêşnayene, Meydanê Aksarayî de dewam kerd. Wekîlê HDPyî Musa Pîroglu, Hemsereka ANYAKAY-DERî Evîne Genç, îdarekar û endamê Rêxistina HDPyî ya Fatîhî zî tewrê çalakîye bîyî.

Polîsanê tirkan waşt ke çalakîye asteng bikerê û hêrişê keyeyanê tepişteyan kerd. Hêriş de merdimanê tepişteyan ra Asliye Calihan, Evîne Genç û 3 kesî pê şîdetî ameyî derbkerdene.

Polîsan Muxabîra Ajansê Mezopotamya (MA) Rukîye Adiguzel zî derb kerde.

Merdimanê tepişteyan ra Kumrîye Akgul vera hêrişê polîsan nêrazîbîyayîşê xo mojna.

Dima polîsan merdimê tepişteyan girewtî binê ablûqa. Polîsan muxabîrê Fersude Hayrî Tunç, muxabîra Arti TVyî Merale Danyildiz, rojnamegere Zeynepe Kuray û Rûkîye Guzel derb kerdî. Polîsan o çax zî Kumrî Akgul, Cemîle Çîftçî û 2 kesê bînî destbend kerdî.

Pîrogluyî vera hêrişê polîsan nêrazîbîyayîşê xo mojna û pare kerd ke mesuldarê merganê zîndanan hukmat o. Pîrogluyî vat: ''Êyê ke pê zulmî wazenê vengê ma bibirnê wa bizanê ke ganê ma ra ber çîyêkê ma çin o ke ma vînî bikerê. Ê ma ra tersenê.''