HDPyî semedo ke rixmê bira Mehkemeya Qanûnê Bingeyî Omer Faruk Gergerlîogluyî nêame veradayene verê Zîndanê Sîncanî de dest pê Nobeta Edaletî kerd.

Polîsan hêrişê nobete kerd, pê şîdetî lajê Gergerlîogluyî Salîh Gergerlîogluyî destbend kerd. Polîsan hêrişê rojnamegeran zî kerd û dest na hacetanê înan ser.Polîsan xeylêk kesî destbend kerdî. 

HDPyîjê ke rixmê hêrişî çalakîye rê dewam kenê eşkerayîye daye.

Wekîla HDPyî ya Îstanbulî Zeleyha Gulum vist vîrî ke Gergerlîoglu xora bîlaheq amebi tepiştene û nika zî rixmo ke Mehkemeya Qanûnê Bingeyî qerarê serbest veradayîşê ci dayo zî qerar nêno caardene û vat: ''Ganî Gergerlîogu cade bêro veradayene. Xora têna vera Gergerlîogluyî dewayê vera Leyla Guvene û vera partîyê ma zî bêhuqûq ê. La Mehkemeya Qanûnê Bingeyî pêvînayîşê nê dewayan pey de erzena. Ma vera na bêhuqûqîye tîya ameyî têhet. Êyê ke tim şuxulnayîşê heqê demokratîkî asteng kenê ewro reyna embazê ma destbend kerdî.  Wa embazê ma yê ke bîlaheq bi hewayêkê bêhuqûqî ameyî destbendkerdene cadê bêrê veradayene. Gergerlîogu îradeyê şarî yo û bîlaheq zîndan de yo. Şima pê nê kerdişê xo sûc kenê.''

Çalakîya wekîlan verê Kampusê Zîndanê Sîncanî de do heta saete 17.00 dewam bikero.