Qezaya Meramî ya Konya de hewt ferdê keyeyê Dedeogullariyî ameybî qetilkerdene. Roniştişê vizêrînî yê dewa de derheqê Alî Keleş û Lutfu Keleşî de zî bira veradîyayîşî dîyaye. Dewa de vergumanê tepişteyî nêmendî.

Dosyaya dewa de qiseykerdişê mabênê verguman Mehmet Altun û polîsan zî est ê. Dosya de dîyeno ke polîso ke xeta 112 ra Altun de qisey kerd ci rê vano 'mêrxasê mi.' Avûkatê keyeyê Dedeogullariyî Abdurrahman Karabulutî waşt ke qeyd bi temamî hetê pisporan ra bêro deşîfrekerdene û bêro cigêrayene la mehkeme waştiş red kerd.

Avûkat Karabulutî ANFyî rê qisey kerd û da zanayene ke seba ke kesê ke peyê nê qirkerdişî de yê eşkera nêbê yeno xîretkerdene.

Karabulutî ard ziwan ke deşîfreya qeydê vengî yê 12 rîpelî de zaf cayan de vajîyeno 'fam nêbeno.' Karabulutî vat: ''Pê vateyê 'fam nêbeno' serê delîlan yeno girewtene. Coka ma waşt ke qiseykerdiş bi temamî bêro deşîfrekerdene la mehkeme no red kerd. No qeyd 15 mengan ra dima ame.  Qeyd de dîyeno ke polîsî bi tersî îfade gênê û vergumanî rê vanê 'mêrxasê mi.' Eşkera yo ke polîs û kiştox heman teref de yê. Mehkeme seba ke kesê ke peyê nê serebûtî de eşkera nêbê nêwaşt ke qeydî bi temamî bêrê deşîfrekerdene.

Cayê qirkerdişî de zî qeydanê kameraya keyeyî de 2 deqayî vînîbîyaye yê. Ma tim wina fikirîyayêne ke kiştoxî bi sereyê xo no qirkerdiş nêkerdo. Ma waşt ke nasnameyê wesayîto ke kiştox pê ameyo, bêrê eşkerakerdene la no waştişê ma zî ame redkerdene. Na mehkeme yew tîyatroyî ra ber çîyêk nîya. Ma do têkoşînê xo rê dewam bikerê û nêverdê dewa bêra mîyankerdene. Nika roniştiş taloqê 17ê teşrîna peyêne ame kerdene û bi îxtîmalê pîlî no do bibo roniştişê bire.''

Qeydanê qiseykerdişê mabênê polîsê Buroyê Cînayetî û Altunî de  polîs Altunî rê vano ke ê heman herême ra yê, rewşa kiştoxî zorê polîsî şina, polîs wazeno hetkarîya ey bikero, keyeyê kiştoxî polîsan rê emanet o û polîs bi vateyê 'mêrxasê mi' xîtabê Altunî keno.