Serekkomarê Tirkîya Erdogan do 27-28ê çeleyî de do şoro paytextê Almanya Berlin de seba weçînayîşan hukmatê Almanya ra paştî biwazo. Hetê bînî ra zîyaretê Erdoganî ra ver Wekîlê AKPyî yê Nevşehîrî Mustafa Açikgozî camîyêka faşîstanê tirkan de, şaristanê Neussî de kurdî û muxalîfî kerdî hedef û gefî wendî.

Rojnameger, tarîxnas, edîtorê rojnameyê Junge Welt Dr. Nick Braunsî derheqê polîtîkayanê Almanya yê vera kurdan de ANFyî rê qisey kerd.

Dr. Braunsî ard ziwan ke kom û ajanê faşîstî tê tirkî Almanya de wayîrê têgêrayîşêkê hîra yê. Nê komî terorî xurt kenê ke merkezê înan Anqara de yo. Beno ke planê kiştişî zî kenê. Sînorê azadîya ajananê tirkan est ê. Beno ke hukmatê Almanya vato 'Se kenê bikerê. Şima wazenê ajanîye bikerê yan zî kurdan tehdît bikerê la welatê ma de çewî mekişê.'

Mîsal gefê Açikgozî seba kontrolkerdişê dişmenîye yo. Qiseyanê Açikgozî ra dima hukmatê Almanya senî têbigêro se bikero ma bivînê û no pêro rayîrî eşkera bikero. Wezîrîya Karanê Teberî ya Almanya qiseyanê Açikgozî ra dima Sersefîrîya Tirkîya rê mesajê şermezarkerdişî da la venga ci nêda. Ganî Almanya bi hawayêkê xurtî cewab bidîyêne qiseyanê Açikgozî.''

Dr. Braunsî vist vîrî ke tehqîqat û muhakemkerdişanê vera MÎTî de heta nika Almanya de ceza û birê bêcidîyetî dîyayê û no zî komanê faşîstan ê tirkan û ajananê MÎTî motîve keno.

Dr. Braunsî vat: ''Nêzdîbîyayîşê Almanya û polîtîkaya krîmînalîzkerdişê kurdan a Almanya cesaret danê ajanan û faşîstan. Seba ke PKK û komê çepî yê Tirkîya 'lîsteya terorî' de cagênê û raştê qedexeyan yenê, ajan û faşîstan de ferasetê 'ma çîyêkê raştî kenê' afernenê.''