Prof. Hamît Bozarslanî derheqê rewş û serebûtanê Sûrîye de ANFyî rê qisey kerd.

Bozarslanî da zanayene ke cara rejîmê Sûrîye Hîzbullahî ra payan ser de mendêne û hêrişanê Îsraîlî yê vera Hîzbullahî darbê pîlî dayê rejîmê Şamî. Bozarslanî vat: ''Rejîmê Şamî seba ke HTŞ xurt o ney seba ke zere de qels bi rijîya. Serebûtê Sûrîye seke dewamê hêrişanê Hamasî yê 7ê teşrîna verêne yê. Xora Îsraîlî waştêne ke Rojhelato Mîyanên wa newe ra bêro dîzaynkerdene. Serebûtanê Sûrîye ra Îsraîl mesuldar o. 

HTŞyî zî binê kontrolê dewleta tirke de herême de dest pê operasyonî kerd. Aseno ke nê cergî hetê dewleta tirke ra ameyê perwerdekerdene. Sûrîye de 10 serran ra pey rejîmê Esadî vurîyabi têgêrayîşê milîsan. HTŞyî hukmatê xo awan kerd û herinda dewletêka reel û rasyonele de hêzêko milîs weçîna. Na rewşe beno ke verê awanbîyayîşê milîsanê bînan abikera.

HTŞ têgêrayîşêko cîhadperest û radîkal o. Na rewşe zî qesawetî virazena. Sûrîye de potansîyelê şîdetî tim est bi. Aseno ke ameyoxê Sûrîye ancî bi şîdetî derbaz bibo. Verê Sûrîye de rewşêka nedîyare est a. Tirkîya wazena ke Rojawanî tasfîye bikera; Amerîka zî wazena ke verê ney bigêra. La çew nêzaneno ke hukmatê Trumpî çend mudaxeleyê Tirkîya do bikero.

Îsraîlî temamîya Giranê Golanî vista destî û teyna 40-50 kîlometre Şamî ra dûrî yo. No zî tewr zaf Sûrîye de meseleyan vejeno. Nîyetê Îsraîlî yê serê Sûrîye nêzanîyenê. Nê pêroyînan ra mumkîn nîyo ke ameyoxê Sûrîye qetî bêro zanayene.

Yeno vatene ke Amerîka mabênê QSD û Artêşa Milî ya Sûrîye de derheqê Minbicî de mabênçîtîye kena û pêkerdişêk ameyo kerdene. Eke no raşt bo ma ver bi senaryoyêkê bînî şinê.''