Pisporê siyaset û huqûqê mîyanneteweyî Prof. Norman Paechî rewşa Rayberê Şarê Kurdî Abdullah Ocalanî nêzdî ra teqîb keno. Prof. Norman Peachî ANFyî rê derheqê tecrîd û herême rê  tesîrê azadîya Ocalanî de qisey kerd.

Prof. Norman Paecho ke xeylêk rayan Rayberê Şarê Kurdî Abdullah Ocalanî reyde pêvînayîşî kerdî, bale ante tepişîyayîşê ey ser û vat: ''Tecrîdkerdiş û tepişîyayîşê ey sûcê meridmîye yê. Xora tîya de rolê Ewropa girîng o. Çunke sere de Almanya welatanê Ewropa bi israrî vatêne ke karê înan pê têkoşînê aadîye yê kurdan çin o. Her parçekerdişê Kurdîstanî de rolê Ewropa esto. Ewropa herinda ke hetê kurdan de biba Erdoganî reyde têgêrena. Eke nê hetî ra bêro ercnayene sebebê tepişîyayîşê Ocalanî zêdêr fam beno.''

Prof. Norman Paechî ard ziwan ke zîndanê Îmraliyî de sîstemê tecrîdî esto û vat: ''Îmrali hetê huqûq û heqanê merdiman ra rîpelo tewr tarî yê Ewropa yo. Pêro Ewropa tecrîd, îşxalê Rojawanî çin hesibnayî. Coka Erdogan game bi game bêperwa beno. Seba ke Erdogan bi rayîrê multecîyan şantajê Ewropa û NATOyî keno Ewropa zî wina têgêrena. ''

Prof. Paechî vist vîrî ke ey tewr peyên serra 1996î de Şam de  Rayberê Şarê Kurdî reyde qisey kerd û vat: ''Ma nê pêvînayîşî de statuyê kurdan ê Rojhelatê Mîyanênî ser o xeylêk nîqaşî kerdbî. O çax ey vatbi ke têna federasyonêk de kurdî eşkenê bi aramî biciwîyê. Dima no proje Rojawan de ame caardene. No sîstemo ke bi îdolojîya Ocalanî awan bîyo, xîreto verên o winasên o. Coka Rojawan beno hedefê Erdoganî. Bêvengîya dinya ya vera îşxalê Rojawanî dejo tewr pîlêr ê welatanê rojawanî yo. Azadîya Ocalanî Rojhelatê Mîyanêbî de do verê prosesêkê neweyî, cuya azade û pêro şaran abikera. 

Tewirê Ocalanî yê seba haştî û demokrasîyî seba şaranê Rojhelatê Mîyanênî û kurdan zaf ercîyaye yo.''