Beşdaranê kampanyaya vera qedexeyê serê PKKyî, Akademîsyonê Zanîneghê Kopenhagenî Prof. Robert Phillipsonî bale ante 'pênaseyê terorîzmî' ser û îfade kerd ke na rewşe hetê dewletan ra bi hawayêkê negatîfî şuxilîyena.

Prof. Dr. Robert Phillipsonî ANFyî rê qisey kerd û vat: ''Bêpênase verdayîş keno ke hukmatî goreyê zerrîya xo ney name bikerê. Rixmo ke tedaya rijnayoxan a vera dewlete sey 'terorî' yena pênasekerdene, no nêzdîbîyayîş beno sebeb ke tedaya dewlete ya vera hemwelatîyan sey 'terorê dewlete' nêra pênasekerdene.''

Prof. Robert Phillipsonî tedaya dewleta tirke ya era kurdan sey 'terorê dewlete' pênase kerd û sûcdarkerdişê Têgêrayîşê Azadîye yê Kurdan mojna kerdişanê vera Kongreya Neteweyî ya Afrîka ke vera rejîmê Apartheidî têkoşîn kerdêne.

Prof. Dr. Phillipsonî vat: ''Mandela seba ke wayîrê xoverdayîşê leşkerî vejîya hetê hukmatan ra bi 'terorîzmî' ame sûcdarkerdene. Afrîkaya Başûrî de mîyanê sîstemê hêzî de, key erkê serdestan qels bi û hewcedarîya dîyalogan ameye qebulkerdene hema tesdîq bi. Rewşêka winasêne de ê hînî 'terorîst' nêdîyayî.''

Prof. Dr. Robert Phillipsonî ard ziwan ke dewleta tirke seba ke sey rejîmê Apertheidî dormeyê masaya dîyalogan de ronişo ganî verî erkanê îqtîdaran bîyara ca û vat: ''Her ke erkê hukmatê AKP-MHPyî zêdîyenê nêpawîyeno ke dormeyê masaya dîyalogan de ronişo. PKK sey 'rêxistina neterorîste' mojnayîş pabesteyê dîyalogan o. Heta ke mabênê Yewîya Ewropa û Tirkîya de têkilîyêka têmîyane estba no zehmet o.''