Şaristanê Kolnî yê Almanya de Qrkerdişê Mereşî ra heta ê Roboskî û Qirkerdişê Zîndanan ra heta Qirkerdişê Rojawanî yê ke hetê dewleta tirke ra ameyî kerdene bi nawnayîşêk ameyî şermezarkerdene.

Nawnayîşî Breslauerplatz de bi deqayêkê rêzgirewtişî yê seba qurbananê qirkerdişan dest pêkerd. Dima FEDA ra Jînda Denîz qisey kerd û bale ante Qirkerdişê Mereşî ser. Jînda Denîz ard ziwan ke şexsê elewîyanê Rayîrê Heqî de hêriş vera cuya komunele ya herême ame kerdene û no qirkerdiş dewamê planê Şark Islahatî bi. Denîze îfade kerd ke nê rojan de zî nê qirkerdişî bi vurnayîşê demokrafîkî dewam kenê.

Dima MARDEF ra Selman Okmenî qisey kerd û vat ke Qirkerdişê Mereşî nika zî bi polîtîkaya vera elewîyan herême de dewam keno û na polîtîka zî destê dewlete ra yena caardene. Parlamentera Verêne ya HDPyî Nursele Aydogan zî pare kerd ke Qirkerdişê Roboskî qirkerdişê şarê kurdî bi û bale ante qirkerdişanê dewleta tirke yê ke Kurdîstanî de kerdî ser. Aydogane şexsê Dayîka Tabete de ke cenazeya ci hewt rojan teber de ameye verdene pêro qurbanî yad kerdî.

Hemsereka NAV-DEMî Aytene Kaplan zî da zanayene ke Qirkerdişê Mereşî, Roboskî û Zîndanan hema zî dewam kenê û vat: "Yadkerdişê merdimanê ke qirkerdişan de ameyî qetilkerdene têna bi xurtkerdişê têkoşînî yenê dewamkerdene."

Dima semah ame kerdene û çalakîye qedîyaye.