Hemserekê verênî yê DBPyî yê Dêrsimî Alî Kurtî pare kerd ke 26ê êlule de saete 20:00 de wexto ke dewa Zêwe ra şîyêke Pêrtagî qoricîyê bi nameyê Vedat Kayayî pê wesayîtî verê Kurtî girewto û çeka xo darte ci.

Kurtî ard ziwan ke dima mabênê ey û qoricî Kayayî de pêrodayîş vejîya û bi wesayîtêkê sivîlî 4 kesî ameyî hetê înan. Kurtî vat: ''Semedo ke nê çar kesî ameyî ez nişta wesayîtê xo û cayê serebûtî ra şîya. Dima ez musaya ke nê 4 kesî leşker ê.''

Kurtî îfade kerd ke qoricî Vedat Kayayî verî zî çend reyî xîret kerd ke provokasyon bikero û vat: ''Nê kesî veyveyan de embazê ma tacîz kerdêne, fek eştêne embazan. Kayayî pê vateyanê 'Ez do Alî Kurtî bikişa' xîret kerdêne ke çimê ma bitersno. Ma do tim vera kesanê winasênan têkoşîn bikerê û apey gamêke nêerzê.

Keyeyê Kayayî çend serrî verî dewe ra şîyî. La reyna zî Vedat Kaya vera yeno dewe de maneno, tay kesan reyde qisey keno. No hêriş a raşte vera pêro dewa ma ameyo kerdene. Ganî dewijê ma na babete de hîsger bibê û nê kesî reyde dîyalogan mekerê. Nê kesî hêrişê mi kerd la qereqol de gerreyê mi kerd. Nika zî xîret keno ke nêweşxane ra raporê derbe bigêro. Ê çar kesî zî cade ameyî cayê serebûtî. Ez nêzanena ke no çîyêko plankerde bi yan çîyêko tesadûfî bi.''

Kurtî bale ante ser ke Dêrsim de serranê peyênan de gefê qoricîtîye bîyî sîstematîkî û şarî rê qoricîtîye yena ferzkerdene. Kurtî vat: ''No kes Vedat Kaya keno ke dewa ma de qoricîtîye teşwîq bikero. Semedo ke o vera nê armancî ma sey astengî vîneno wina provokasyonan keno. Ma tim vera nê kerdişî bîyî û ma do qetî teslîmê provokasyonan nêbê.''

Hemserekê verênî yê DBPyî yê Dêrsimî Alî Kurtî vat ke 27ê êlule de ey îfade dayo Qereqolê Cendirmeyan ê Pêrtagî û o do gerreyê Vedat Kayayî bikero.