Anqara de Meydanê Garî de 10ê teşrîna verêne ya 2015î de mîtîngê demokrasî û haştîye de hêrişê DAÎŞî de 104 kesî ameybî qetilkerdene. 

Serrgêra 7. ya qirkerdişî de serkêşîya Komeleya Paştdayîş û Haştîye yê 10ê Teşrîna Verêne de merasîmêkê yadkerdişî ame kerdene. Hemserekê HDPyî Mîthat Sancar, Serekê EMEPî Ercument Akdenîz, Wekîlê TÎPî Ahmet Şik, Wekîlê HDP û CHPyî, temsîlkarê KESK, TMMOB û DÎSKî û keyeyê qurbanan zî tewrê merasîmî bîyî. 

 Merasîmî ra ver polîsan pêro kuçeyî girewtî binê ablûqa û kerd ke girseyî asteng bikerê. Polîsan tîya de hêrişê girseyî kerd û xeylêk merdimî zî destbend kerdî. 

Keyeyanê qurbanan pê fotografan û pankartan ver bi Garî çalakîya rayraşîyayîşî kerde û sloganê sey 'Kiştox DAÎŞ, hemkar AKP' vatî.

Merasîmê yadkerdişî pê deqayêkê rêzgirewtişî dest pêkerd. Sereka Komeleya Paştdayîş û Haştîye ya 10ê Teşrîna Verêne Mehtape Sakîncî merasîm de qisey kerd û vera şîdetê polîsan nêrazîbîyayîşê xo mojna. Mehtape Sakîncî vat: ''Ma vera na bêedaletîye vengê xo vejenê. Eke Qirkerdişê Anqara rê edalet nêro çewî rê do nêro.''

Hemsereka KESKî Şukrane Kablan Yeşîl zî polîtîkayê mabênê 7ê hezîrane-1ê teşrîna peyêne vistî vîrî û vat: ''Înanê ke o çax zî qisey nêkerdêne zemînê nê qirkerdişî amade kerd û ê zî faîl ê. Heta ke sîyasetmedarê mesuldarî bêrê muhakemekerdene têkoşînê ma do dewam bikero.''

Sereka DÎSKÎ Arzu Çerkezoglu zî bale ante ser ke prosesê weçînayîşî de no qirkerdiş ame kerdene û ê do meverdê ke prosesê nê weçînayîşî de qirkerdişo winasên reyna biqewimîyo.

Dadîya qurbanê qirkerdişî Korkmaz Tedîkî Zohre Tedîk ard ziwan ke heta ke kiştoxan ra hesab bipersê keyeyê qurbanan do têkoşînê xo rê dewam bikerê û meydanê Garî de bibê.

Serekê TMMOByî Emîn Koramazî da zanayene ke dewlete xîret kena ke serê nê qirkerdişî bigêra û vat: ''Peyê nê qirkerdişî de dewlete est a.''

Sekreterê Pêroyî yê TTByî Vedat Bulutî dîyar kerd ke ê do tim haştîye bipawê û heta ke mesuldarî ceza bigêrê têkoşînê demokrasî, kede û haştîye rê dewam bikerê.

Qiseykerdişan ra dima girseyî verê peykerê temsîlîyî de qeranfîlî nayî ro. Keyeyan reyna dest sawit fotografê domananê xo rê û sozê têkoşînî da.