10ê teşrîna verêne ya 2015î de nawnayîşê haştîye yê Platformê Kede û Demokrasî de Garê Anqara de pê destê DAÎŞî qirkerdişêk ame kerdene. Qirkerdiş de tewr tay 104 merdimî ameyî qetilkerdene û 500 merdimî zî birîndar bîyî. Serrgêra qirkerdişî de qurbanî xeylêk şaristanan de ameyî yadkerdene.

Dêrsim

Hetê Platformê Kede û Demokrasî yê Dêrsimî ra qurbanê qirkerdişî Dêrsim de ameyî yadkerdene. Hêzanê Kede û Demokrasî Meydanê Seyîd Rizayî de eşkerayîyêke daye. Wekîlê HDPyî yê Dêrsimî Alîcan Onlu zî tede xeylêk merdimî tewrê eşkerayîye bîyî.

Eşkerayîye de ame vatene ke sey qirkerdişanê bînan kerdoxê Qirkerdişê Garî zî eşkera yo û dîya zanayene ke semedo ke kurdî, elewîyî, sûryanî, armenî û sosyalîstî mekewê Meclîsî weçînayîşê teşrîna peyêne ya 2015î ra verî îqtîdarî welat vurnayo gola gonîye. Eşkerayîye de ame vatene ke hesabê nê qirkerdişî qetî do bêro persayene.

Dima qurbanê qirkerdişî Mesut Mak û Adîl Gur serê goranê xo de ameyî yadkerdene û loqmayî ameyî vilakerdene.

Hêzanê Kede û Demokrasî yê Îstanbulî binê ablûqaya polîsan de qurbanê Qirkerdişê Garî yad kerdî. Wekîla HDPyî Zuleyha Gulum zî tede xeylêk temsîlkarê partî û rêxistinan tewrê merasîmî bîyî. Deqayêkê rêzgirewtişî ra dima eşkerayîye hetê gazîyê Qirkerdişê Garî Ozer Degîrmendî û Vervatoxê KESKî Ozer Tuncerî ra ameye wendene.

Eşkerayîye de ame vatene ke AKPyî semedo ke îqtîdarê xo rê dewam bikero welat de xeylêk qirkerdişî kerdî, rayîr da ke cergê EL Qaîde û DAÎŞî welat de bi rehetî têbigêrê. Eşkerayîye de ame parekerdene ke rixmê provakasyon û qirkerdişanê AKPyî ê do tim haştîye biwazê. Eşkerayîye de ame vîrvistene ke dewaya Qirkerdişê Garî bi hawayêkê edîlî nêna kerde û mesuldarê raştikênî nênê muhakemekerdene ke no zî eşkera keno ke no qirkerdiş cînayetêko sîyasî bi. Eşkerayîye de ame vatene ke hêzê haştî, kede û demokrasî bi qerardarî têkoşînê xo rê do dewam bikerê.

Anqara

Serrgêra Qirkerdişê Garî yê Anqara de verê Garî de çalakîya yadkerdişî ameye kerdene. Polîsan hêrişê çalakîye kerd û xeylêk kesî destbend kerdî. Polîsanê ke destê înan de lîsteyêke estbî vat ke keyeyanê qurbanan ra ber çew nêeşkeno bêro Garî. Koma 30 kesan naye ser o waşt xo biresna Hîrêrayîrê Ulaştirma. Polîsan hêrişê kome kerd, xeylêk kesî erdî ra kaş kerdî û 22 kesî destbend kerdî. Polîsan rojnamegeran rê zî şîdet kerd.

Keyeyan reyde sere de wekîlê HDPyî xeylêk temsîlkarê rêxistinan û sendîkayan zî tewrê merasîmê Garî bîyî. Wextê qirkerdişî de saete 10.04 de girseyî deqayêk rêz girewt û sloganî vatî.

Dima Sereka Komeleya Haştîye ya 10ê Teşrîna Verêne Mehtape Sakîncî Coşgun qisey kerd vat: ''Mabênê di weçînayîşan de wextê tarîyî yê 2015î de Qirkerdişê Garî cînayetêko sîyasî bi.''

Sereka DÎSKî Arzu Çerkezoglu, Hemserekê KESKî Mehmet Bozgeyîkî û Serekê TMMOBî Emîn Korkmazî zî merasîmê yadkerdişî de qisey kerd û pare kerd ke ê do hesabê nê qirkerdişî bipersê, metersê, her serre Meydanê Garî de binê.

Dima semedê qurbananê qirkerdişî balonê sîyayî vera dîyayî hewa û qerenfîlî nayî ro.

Hetê bînî ra polîsan hêrişê merasîmê yadkerdişî yê Meydanê Sakarya û Konur Sokakî kerd û tewr tay 30 kesî destbend kerdî.

tarafından gözaltına alındı.

Îzmîr

Hêzanê Kede û Demokrasî yê Îzmîrî verê Garê Alsancakî de qurbanî yad kerdî. Wekîla HDPyî Serpîle Kemalbay, Wekîlê CHPyî Kanî Beko, Şaredarê Îzmîrî Tunç Soyer zî tewrê merasîmî bîyî. Nameyê Sendîkaya DÎSKî ser o Memîş Sariyî qisey kerd û waşt wezîfedarê umûmîye û sîyasetmedarê mesuldarê nê qirkerdişî wa bêrê muhakemekerdene.

Şirnex

Verê bînaya HDPyî ya Şirnexî de eşkerayîyêke dîyaye û qurbanî ameyî yadkerdene. Aktîvîstê Têgêrayîşê Cinîyan ê Azadan (TJA), endamê Meclîsê Mayanê Haştîye, Wekîlê HDPyî Hasan Osguneş û endamê partîye tewrê merasîmî bîyî. Hemsereka HDPyî ya Şirnexî Zeynepe Salgucak merasîm de ard ziwan ke mesuldarê nê qirkerdişî hema zî wezîfeyanê xo ser de yê.

Adana

Verê bînaya Şaredarîya Seyhanî ya Adana de semedê yadkerdişê qurbanan eşkerayîyêke dîyaye. Dadîya Dîlane Sarikayaya ke qirkerdiş de amebî qetilkerdene Neslîgule Sarikaya merasîm de vat: ''Ma bi qerardarî vanê haştîye çunke ma semedê haştîye bedelê giranî dayî.''

Serekê Konseya Merkezî ya TTByî Dr. Şebneme Korur Fîncanci vat: ''Semedê haştîye, kede û demokrasî ma do têkoşînî rê dewam bikerê.'' Wekîlê HDPyî Kemal Pekozî zî îfade kerd ke qirkerdişê Garî verê çimanê dewlete de bi.

Antalya

Hêzanê Kede û Demokrasî yê Antalya verê Peykerê Attalosî de merasîmê yadkerdişî kerd û semedê qurbanan qerenfîlî nayî ro.