Netîceya hêrişê DAÎŞî de 10ê teşrîna verêne ya 2015î de Garê Anqara de 104 kesî ameybî qetilkerdene. Bi wesîleya menga 90. ya qirkerdişî, seba qurbanan merasîmêk ame kerdene. Komeleya Haştîye ya 10ê Teşrîna Verêne (10 Ekîm-Der) verê Garî de eşkerayîyêke daye. Eşkerayîye de sloganî ameyî vatene.

Sereka 10 Ekîm-Derî Mehtape Sakîncî Coşgun merasîm de qisey kerd û vist vîrî ke qirkerdişî 90 mengî xo pey de verdayî la hema zî edalet nêameyo ca. Coşgune vat: ''Ma merdimê xo prosesê weçînayîşî de vînî kerdî. Ma zanenê ke ê kesanê ke vatêne 'Eke ez serebûtanê mabênê di weçînayîşan ser o qisey bikera, kerre serê kerre de do nêmana', ê nê prosesî de zî rol gênê. Wa sozê vengî nêrê dîyayene ma. Heta ke no qirkerdiş nêro roşnîkerdene asayîşê cuya şarî çin o û edaleto raştikên nêno caardene. Seba ke edalet bêro ma do heta peynî têkoşîn bikerê.''