EUINTCENo ke yewina îstîxbaratî ya Yewîya Ewropa ya, derheqê raporê Qirkerdişê Garî yê 10ê Teşrîna Verêne de raporêk amade kerdbi.  Raporo ke 13ê teşrîna verêne ya 2015î de erşawîyayo mekanîzmayanê bire ya Yewîya Ewropa (YE) eşkera bi.

Beşo tewr girîng ê raporî no yo ke tede yeno vatene mabênê Qirkerdişê Pirsûsî û Qirkerdişê Garî de têkilîyêke esta.

Beşê ercnayîşî yê raporî de nê çîyî ameyî vatene:

''-Hedefê hêrişê Anqara de Partîya Sosyalîste ya Bindestan (ESP) estbi. Hemsereka HDPyî Fîgene Yuksekdag zî ronayoxanê ESPyî ra bîye. Weçînayîşê 1ê teşrîna peyêne û şuxilnayîşê şîdetî yê vera PKKyî ra verî no hêriş ame kerdene.

-Mabênê hêrişanê Pirsûs û Anqara de rewşê seyciyî estê. Wird hêrişanê bi bomba de hûmara polîsanê pawitişî kêm bîye yan zî tewr çinbîye. Wird nawnayîşan de ESP estbi. Wird nawnayîşî derheqê kurdan de bîyî. Wird hêrişan de DAÎŞ verguman o.

-Hêrişê Anqara de ke tede çalakîkeranê haştîye yê kurdan ca girewtbî, mesuldarîya ci do milê DAÎŞî de bimana ke serê sînorê Tirkîya yê Sûrîye û Iraqî de aktîf o. La guman esto ke hêzê ke bi xurtî paştî danê polîtîkayanê şîdetî yê hukmatî beno ke tewrê nê hêrişan bîyê.

-Tarz û şiklê hêrişî (hêrişê bi bombayan o ke hêrişkeran bombayî girê dabi xo rê) verî bala merdimî ancenê DAÎŞî ser. La wexto ke merdim vîneno ke polîsan otobusê çalakîkeran kontrol nêkerdî û nawnayîşê polîsî de seke tewr polîs çinbi nê kifş kenê ke tay hêzanê AKPyî milîtanê DAÎŞî bi taybetî wezîfedar kerdî.

Eşkera bi ke bi fermanê endamê DAÎŞî yê bi nameyê Îhamî Balîyî qirkerdişê Pirsûs û Anqara ameyê kerdene û asayîş serra 2002î ra nata nê kesî teqîb keno. Vejîya werte ke qirkerdişî ra dima Serdozgerîya Komare ya Anqara derheqê tay selahîyetdaranê polîsan de bi sûcê 'wezîfeyê xo xirab şuxilnayê' tehqîqat abikera la Walîtîya Anqara destûr nêda ney. Raporê mufetîşan de ame parekerdene ke asayîşî îxtîmalê hêrişî ser o nawnayîş de xebatkarê xo hişyar kerdê la beşdarê nawnayîşî û komîteya nawnayîşî hişyar nêkerdê.

Çarçewa tehqîqatî de derheqê Fermandarê DAÎŞî yê Dîlokî Yunus Durmazî de zî agahîyêke vejîyaye werte. Amebi eşkerakerdene ke derheqê dewayêka 11ê teşrîna peyêne ya 2013î de Mehkemeya Cezaya Girane ya Îstanbulî bira tepişîyayîşê Durmazî daya.