Serkêşîya Platformê Dezgehanê Demokratîkan de çarçewaya Hemlemya Abdullah Ocalanî rê azadîye, meseleya kurdan rê çareserîya sîyasîye de Amedî ra ver bi Anqara Rayraşîyayîşê Azadîye û Çareserîya Demokratîke dîya destpêkerdene.

Hemserekê MED TUHAD-FEDî Kerem Canpolat û hunermendo krud Kadir Çatî semedê tewrbîyayîşê rayraşîyayîşî veng da.

Kerem Canpolatî nê vatî: ''Tirkîya de tengayîya pîle est a. Sebebê nê yo tewr pîl tecrîdê serê Birêz Abdullah Ocalanî yo. Ma vera tecrîdî dest pê nê rayraşîyayîşî  kerd. Bi nê rayraşîyayîşî ma wazenê Tirkîya de wa demokrasî bêro înşakerdene û meseleya kurdan bi rayîranê demokratîkan bêra çareserkerdene. Ganî dewlete cade semedê meseleya kurdan gaman bierzo. Heta ke meseleya kurdan çareser nêbo meseleyê bînî çarser nêbenê. Ma tîya ra veng danê her kesî; ma semedê çareserîya demokratîke destê yew bînan tepişê.''

Kadir Çatî zî nê vatî: ''Hinî qewimîyayîşê Rojhelatê Mîyannenî û Rojawanî mojnenê ke şarê Tirkîya senî hewcedarê haştîye yê. Na çarçewe de seba ke muzakereyî newera dest pê bikerê no rayraşîyayîş zaf muhîm o. Ma tîya ra ven danê pêro şarê xo ke wa tewrê rayraşîyayîşî bibo. Cayê çareserkerdişê meseleya kurdan meclîs o. Meclîs ganî helêke cuwa ver wezîfeyê xo bîyaro ca. Ma pêro şarê xo pawenê wa tewrê rayraşîyayîşî azadîye bibo.''