Kadikoyê Îstanbulî de serkêşîya HDK, KCD, TJA, HDP, DBP û MED TUHAD-FEDî de bi şîarê ''Ma vera sîyasetê tecrîdî semedê pawitişê azadîye ver bi Gemlîkî şine'' Rayraşîyayîşê Gemlîkî ame kerdene.

Rayraşîyayîşo ke ameyêne waştene ke Kadikoyî ra ver qezaya Gemîlî ya Bursa bêro kerdene raştê hêrişê polîsan ame û xeylêk kesî bi îşkenceyî ameyî destbendkerdene. Wekîla HDPyî Dilşate Canbaz Kaya zî raştê hêrişê polîsan ameye.

Şar rixmê astengkerdişê polîsan bi slogana ''Her ca tecrîd her ca xoverdayîş o'' kewt rayîr. Polîsan bi desan rey verê çalakwanan girewt.

Naye ser o Wekîlsere  Serekwekîla Grûba HDPyî Merale Daniş Beştaş tîya eşkerayîye daye. Beştaşe vat: ''Asaşîyê Îstanbulî kar û gureyê xo caverdayo kewta ma dima. Ewro partîya ma û partîyê pabesteyê ma ma pêro pîya semedê Rayraşîyayîşê Gemlîkî ameyî tîya. Gemlîk de berê partîya ma qefilnayo. Îdarekarê ma yê ke yew kafe de roniştêne ameyî destbenkerdene. Naye xo vîra kenê, şima se kenê bikerê nêeşkenê verê ma bîgêrê. Seba ke şerê xo bidê domnayen Birêz Ocalanî ser o tecrîdî giran kenê. Şima nêeşkenê bi nê astengkerdişan vengê haştîye yê bi mîlyonan nimz bikerê. Hîrê mîlyonan ra zafêr kesan semedê Birêz Ocalanî îmzayî dayî. Şima tersî ra wina hêriş kenê. Şima sûc kenê, şima nêeşkenê îradeyê şarî asteng bikerê. HDP û no şar peyser gamê nêerzenê.Ma do pêro pîya tecrîdî bişikinê û demokrasîyî bîyarê nê welatî.''

Hemserekê KCDyî Berdan Ozturk zî  bale ante ser ke Rayberê Şarê Kurdî Abdullah Ocalan bi felsefeya xo seranserê dinya de bîyo hêvîya şaran û vat îqtîdar semedê şer, merg û qirkerdişan tecrîdî xorî keno.

Gama ke Ozturkî qisey kerdêne polîsan pê zorî xebatkarê çapemenîye warî ra vetî. Wekîlan mudaxale kerd ke destûr medê la polîsan ê pê îşkenceyî ê vetê teberê çemberî.

Çalakwanî reyna kuçeyanê Kadikoyî de ameyî têhet û bi sloganan Imraliyî rê selamî şawitî û xoverdayîşê zîndanan selam kerd.

Wekîlê HDPyî Omer Ocalanî ke tîya qisey kerd vera hêrişan nêrazîbîyayîş mojna û vat: ''Rewşa ewroyî reyna ramojna ke Tirkîya dewleta qanûnî nê dewleta polîsan a.''

Şaro ke rixmê astengîya polîsan heta banê HDPyî yê qeza reyra şi mesajê pîlkerdişê têkoşînî dayî.