Ciwananê kurdan û Almanya, Îngilistan, Fransa, Swîsre, Kolombiya, Awûstralya, Îtalya, Spanya, Hollanda ûsn ra enternasyonalîstanê Ewropa seba azadîya Rayberê Şarê Kurdî Abdullah Ocalanî şaristanê Essenî yê Almanya de dest pê Rayraşîyayîşê Dergî kerd.

Ciwanî destpêk de verê Merkezê Komelê Demokratîkî yê Kurdan de ameyî têhet û seba şehîdan deqayêk rêz girewt. 

Nameyê Komîteya Amadekarîye ser o Çekdar Serhadî eşkerayîye wende û vat: ''Ma do ewro seba Rayber Apoyî rayraşîyayîşê dergî bikerê. 18 mengî yo Rayber Apoyî ra xebere çin a. Ma do seba azadîya ey tim çalakîyan bikerê. Ma hêzanê gerîlayan selam kenê ke koyan de vera çekanê kîmyewîyan şer kenê. Ganî ma zî bibê parçeyê nê şerî. Bi ruhê 14ê Temmuze, bi ruhê Bêrîtane û Zîlanan ma do xoverdayîşî rê dewam bikerê.''

Komîteya Amadekarîye ra Mordem Adarî vat: ''Rayraşîyayîşo derg o verên Hanua ra heta Hannoverî 17 rojan dewam kerdbi. No rayraşîyayîş vera tedaya zîndanan û agahîya şehadetê Mazlûm Doganî ser amebi kerdene. Mîyanê çalakîkeranê ê rayraşîyayîşî de Hozan Sefkan, Kasim Engîn û Hozane Mizgîne est bîyî. Şehîd Kasim Engînî ê rayraşîyayîşî de vatbi 'Kolonyalîzmê dewleta tirke hînî pey de mendo.' Ma ewro nê rayraşîyayîşî rê dewam kenê. Ma nê rayraşîyayîşî dîyarîya embazanê ke Herêmanê Pawitişî yê Medya de xo ver danê, kenê. Azadîya Rayberîya ma azadîya şarê ma ya.''

Ciwanan dimayê eşkerayîye dest pê rayraşîyayîşî kerd. Rayraşîyayîş do 6 rojan dewam bikero û ewro heta Duisburgî şoro.