Wekîla Partîya Demokratîke ya Şaran( HDP) Remzîye Tosun Heyetê Pêroyî yê Meclîsî de  vera tecrîdê serê Rayberê Şarê Kurdî Abdullah Ocalanî û şerê vera Rojawan û Başûrê Kurdîstanî laçika xo ya sipî eşte war.

Remzîye Tosun vera sîstemê tecrîdê Îmraliyî û şerî nê vatî:  “Seba ke meseleya kurdan nîna çareserkerdene, komel ancîyeno mîyanê felaketî. Heta inkey her metodê zextî ameyî kerdene û dewam kenê. Îdareyanê ke semedê çaresernêkerdişî kerd xo çeng, raştê têkoşînî ameyî. Serranê 90yan de vera tarîtîye Dayîkê Şemeyî bîyî serkêşê têkoşînî.  Dayîkê Haştîye û têkoşînê cinîyan vera şerî têkoşîn keno.  Xeylêk cayanê welatî de nobetê edaletî dewam kenê. Inkey her wextî ra zafêr ma hewceyê haştîye yê. Pêkewtişan de tewr zaf dayîkî derbe genê. Tradîsyonanê ma de cinîyê ke laçika xo ya sipî erzenî war, ganî ewro nê hêzê xo bişuxulnê. Seba ke pêkewtişî biqedîyê, sîstemê tecrîdî bêro wedaritene, haştîyêka birumete bêro na cografya, ez laçika xo erzana tîya ke qerarê şerî tede yenê girewtene. Wa operasyonî bêrê vindetene, sîstemê îmraliyî bêro wedaritene û bêrê haştîya birumete bêro akerdene.”