Hemsereka Verêne ya DTP û Hetkara Verêne ya Hemserekanê HDPyî Aysele Tugluka ke Zîndanê Kandira de tepişîyena, rewşa ci ya weşîye vera bena giranêr.  Vîrê Aysele Tugluk ca de nîyo û a pê hetkarîya embazanê xo yê hucreyî eşkena hewcedarîyanê xo peyda bikera.

Fakulteyê Tipî yê Kocaelî derheqê Tugluke de raporê ''nêeşkena zîndan de bimana'' dabi la semedo ke Dezgehê Tipê Edlîye (ATK) yê Îstanbulî eqsê raporê Fakulteyê Tipî raporêk da Tugluke vera nêdîyena.

Avûkata Tugluke Reyhane Yalçindag ANFyî rê qisey kerd û bale ante ser ke şert û mercanê zîndanî ra rewşa Tugluke vera bena giranêr.

Yalçindage da zanayene ke dima ke vera cenazaya dadîya Aysele Tugluk hêrişo nîjadperest ame kerdene reşwa ci bîya giranêr.

Yalçindage vat: ''Tugluke wextêk nêweşîyê xo keyeyê xo ra zî nimitî. Nêwaşt kesê xirabî nêweşîyanê ci bişuxilnê. Fakulteyê Tipî yê Kocaelî 7 mengî Aysele Tugluk teqîb kerde û raporêk amade kerd. Fakulteyê Tipî raporê xo de vat ke Tugluke nêeşkena zîndan de bimana. Rixmê ney zî ATKyê Îstanbulî raporê xo de vat 'eşkena zîndan de bimana.' ATK tim wina têgêrena. Ma seba ke nakokîya mabênê raporanê ATK û Kocaelî eşkera biba muracatê Weqfa Heqanê Merdiman a Tirkîya (TÎHV) kerd û waşt ke doktorê pisporî wa raporêkê alternatîfî amade bikerê. TÎHVî zî raporê xo de nakokîye eşkera kerde û pare kerd ke ganî Heyeto Berz ê ATKyî Tugluke muayene bikero. Ma 5 hewteyî verî muracatê heyetê berzî kerd la hema cewab nêdîya ma.''

Yalçindage îfade kerd ke embazê ci yê hucreyî seba peydakerdişê hewcedarîyan hetkarîya Tugluke kenê. Yalçindage vat: ''Aysele Tugluk bi zorî qisey kena, nan wena, nusena, şimena ûsn. Coka a nêeşkaye bêra mehkeme. Wexto ke ma şîbî zîyaretê ci tay çîyî nêameyî vîrê ci. Şertanê xiraban ê zîndanî ra rewşa ci bena giranêr. A hucreyê 3 kesan de manena, tim heman merdiman û nesneyan vînena. Ma venga dezgehan danê ke goreyê etîkê zanist, tip û exlaqî têbigêrê. Muwekîla ma ganî cade vera bidîya û tedawî biba.''