Tepişteyo nêweş Soydan Akay Zîndanê Asayîşê Berzî yê Marmara de hucreyê yewkesî de tepişîyeno û rewşa weşîya ey bena giranêr. Akay adare de di reyî ameyî wedaritene nêweşxaneyî. Akay de nêweşîya enfeksîyon, qelb û tansîyonî est ê.

26ê adare de Akay ancî wedarîyabi nêweşxaneyî. Keyeyê ey belgeyê nêweşxaneyî mojnayî doktoranê cîyayan û musa ke Akayî krîzê qelbî derbaz kerdo.

Hezîrana 2018î de zî teşhîsê kanserê prostatî dîyabi Akayî. Akay de romatîzma, hepatît B û spazmê qelbî zî peyda bîyî. Tehlîyeya Akayî hetê Heyetê Îdare û Çimdarîye ra bi hawayêkê keyfî reya çarine sibtae de ameye astengkerdene.

Akayo ke Gimgimê Mûşî ra yo lîseyî ra pey tewrê têgêrayîşê azadîye bibi. O 1993 de Îzmîr de amebi tepiştene. Akayo ke 32 serrî yo zîndan de yo heta nika xeylê zîndanan de mend.

Wekîla DEM Partî ya Wanî Gulcane Kaçmaz Soyyîgît derheqê rewşa Soydan Akayî de vernîyazêk dabi Wezîrîya Edaletî.