Tepişteyo nêweş Kazim Karataş (59)o ke nêzdîyê 30 serran o tepişte yo rewşa ci ya weşîye bena xirabêr.

Kazim Karataşo ke Zîndanê Tekîrdagî de tepişîyeno 1991 de 'endamîya rêxistine' ra erzîyabî zîndanî. Karataş heta nika zîndananê Îzmîr, Aydin, Dîlok, Karabuk, Riha Hîlwanî rê amebi surgunkerdene. Karataş de nêweşîyê qelb, şeker, tansîyon, paştî estê.

Kênaya Kazim Karataşî Gulîstane Karataşî îfade kerd ke seba veradayîşê babîyê ci înan zaf muracat kerd la tim red girewt. Gulîstane da zanayene ke babîyê ci zaf reyî anjîyo bîyo û çeleyê 2016î de zî amelîyat bîyo.

Gulîstane Karataş vat: ''Amelîyatî ra verî zî lingê babîyê mi ameybî kelemçekerdene. Amelîyatê ci zaf giran bi. Ma pê qerqilîyenê. Hetê bînî ra ê zîndanî de teda û şîdet zaf ê. Mi çar reyî kargo şawit la her rey kargo apey açarîya. Nê kerdişî bêhuqûqî yê. Ma rê yeno ferzkerdene ke ma edalet, huqûq û têdûştîye ra fek vera bidê. La ma do nêdê. Seba caardişê edaletî û têdûştîye ma do qetî têkoşînî ra fek vera nêdê.''