Rêxistinê elewîyan bi şîara ''Yewîya Rayîrî, Yewîya Têkoşînî'' Dergahê Garîp Dede yê Kuçukçekmece de ameyî pêser. Kombîyayîş hetê Konfederasyonê Yewîyanê Elewîyan ê Ewropa, Federasyonê Elewî-Bektaşî, Komeleya Kulturî ya Pîr Sultan Abdalî, Federasyonê Komeleyanê Elewîyan, Federasyonê Waqifanê Elewîyan û Komeleya Demokratîke ya Elewîyan ra ame serûberkerdene û tede derheqê tedaya elewîyan rê yena kerdene û têkoşînê verba naye de muneqaşeyî ameyî kerdene. Wekîlê HDPyî Mehmet Alî Kenanoglu, Zeynel Onen, Kemal Bulbul, Wekîlê CHPyî Alî Şeker, temsîlkarê dezgehanê elewîyan û zaf hemwelatî tewrê kombîyayîşî bîyî.

Kombîyayîş bi tavisnayîşê çilayan dest pêkerd. Serekê Pêroyî yê Konfederasyonê Komeleyan ê Elewîyan Celal Firatî qiseykerdişê destpêkî kerd û vat: "Ma do sîstemo ke înan bi zorî ma rê da ciwînayene ser o qisey bikê. Ma do can, hemrayîrîye, riza ser o qisey bikê. Estbîyayîşê ma her dewirî de newe ra ame daşinasnayene û bi xîretanê asîmîlasyonî û tedbîranê asayîşî şarê ma her reye newe ra ame qetilkerdene. Ma heqanê xo yê ke tim ameyî redkerdene û qesawetê qetilbîyayîşî, rêxistinanê ma yê Ewropa reyde do çare bikê. Ma baş zanenê ke ma hînî teyna nîyê. Ma do firsend nêdê ke bawerîya ma ya elewîyîye vîndî biba. Naye ra pey elewîyî, rêxistinê elewîyan do red bikê ke seba rayan, weçînayîşan bêrê xapinayene û xebitnayene. Ma û rayê ma firsendê çewî nîyê."

Nameyê Konfederasyonê Yewîyanê Elewîyan ê Ewropa ser o Serekê Dîyin Mehmet Alî Çetînkayayî qisey kerd û vat: "Elewîyê ke Ewropa ra yenê Tirkîya hîna ke nêkewtê Tirkîya apey yenê erşawitene Ewropa. Wazenê ke rêxistinanê Ewropa û ê Tirkîya cîya bikê. Ma kenê ke nê rêxistinan bikê yew û ma do seba naye xebatanê xo dewam bikê. Tirkîya serekê ma destbend kena û destûr nêdana ke şoro teberê welatî. Ma nê qedexeyî seke seba pêro elewîyan yeno xebitnayene hesibnenê. Ganî ma hem Ewropa û hem zî Tirkîya de sey rêxistinanê elewîyan bibê yew. Kes nêeşkeno ma cîya biko."

Qiseykerdişan ra dima dîwan ame ronayene. Temsîlkaranê dezgehan derheqê problemanê ke heta nika dîyî de qisey kerd.