Elewîyan vera dersa dînî ya mecbûrîye xeylêk şaristanan de mîtîngî kerdî. Rêxistinanê elewîyan Meydanê Rihtimî yê Kadikoyî yê Îstanbulî de mîtîngê ''demokrasî û laîkîye'' kerd. Temsîlkarê partî, dezgeh û rêxistinanê elewîyan, pîr, rayber û anayê elewîyan tewrê mîtîngî bîyî. Mîtîng de deyîrbazê elewîyî vejîyayî serê sehneyî. Dima eşkerayîya hempare ameye dayene.

Eşkerayîye de ame waştene ke dersa dînî ya mecbûrî wa bêra wedaritene, perwerdeyê bi ziwanê dayîke bêro dayene. Eşkerayîye de ame vîrvistene ke qeymeqamê Qisle bi destê dewlete eşt cemxaneyê Duzgun Babayî ser û ame vatene ke cemxaneyî tim hedefê dewlete de yê. Eşkerayîye de wina ame vatene: ''Bi çimê tîcaretxane yeno ewnîyayene cemxaneyan û elewîyan rê polîtîkayê asîmîlasyon û cîyakerîye tim zêdîyenê. Ma qebul nêkenê ke binê nameyê dersa mecburîye de dersa dînî bêra dayene domananê 4-6 serreyan. No vera qanûn û laîkîye yo. Perwerdeyê tekperest, nelaîk, zanistî ra dûr, cînsî, asîmîlekarî rê ney. Ma hemwelatîya têdûşte wazenê.''

Mîtîngî ra dima muzîkî reyde govende ameye girewtene. Dima ke girse vila bi 3 ciwanî bi bahaneya ke 'propagandaya rêxistine' kenê ameyî destbendkerdene.

Dêrsim de Hêzanê Kede û Demokrasî Meydanê Seyîd Rizayî de eşkerayîya çapemenîye daye. Serekê Şubeyê Dêrsimî yê Komeleya Kulturî ya Pîr Sultan Abdalî (PSAKD) Ekber Kayayî eşkerayîye wende. Kayayî ard ziwan ke elewîyî nasname û bawerîya xo ra yenê asîmîlekerdene û selahîyetdarê dewlete pê çekan bi rehetî erzenê cemxaneyan ser. Kayayî vat: ''Ewro yeno waştene ke şarî pêbikewê, sûcî bêrê meşrûkerdene, tepişteyê sîyasîyî zîndanan de bimirê. Ma do hemkarê nê sûcan mebê. Dersa dînî projeyê şikldayîşê komelî yo. Ganî no proje cade bêro betalkerdene.''

Îzmîr, Adana û Anqara de zî bi heman armancî elewîyî ameyî yewca û înan dersa dînî ya mecburîye protesto kerde.