Rayberê Şarê Kurdî Abdullah Ocalano ke 15ê sibata 1999î de sey esîr ame girewtene vera ci tecrîdo giran dewam keno. Şarê kurdî yo ke Ewropa de ciwîyeno seba ke tecrîdê 23 serran bişikno û Abdullah Ocalanî azad bikero payan ser o. Verê dezgehanê mîyanneteweyî yê Starsbourgî de çalakîyî bêmabên dewam kenê.

Temsîlkara TJK-E Besîme Konca, Aktîvsta TekoJIN Tekoşîne Koçgirî, Hemsereka HDPyî ya Ewropa Leyla Imret, Endama TJK-E Asmîne Engîn û Hemsereka Meclîsê Cinîyan ê Ronahî yê Baselî  Zeynep Kayran yê ke tewrê Kampanyaya 'Azadîye do ser bikewo-semedê Ocalanî têbigêrê' bîyî ANFyî rê qisey kerd.

Besîme Konca: Eslê xo de tecrîdo ke 22 serrî yo yeno domnayene Lozanêk o. Reyna hêrişê ke Şingal, Rojawan û Başûrê Kurdîstanî de vera kurdan yenê kedene pabesteyê naye. Hêzanê ke Lozan de kurdî bêstatuyî verdayî ewro paştî danê Tirkîya ke Kurdîstan de şero leyminî bikero. Heme dezgehê mîyanneteweyî semedê tecrîdî berpirsîyar ê. CPT zî raporê xo de ard ziwan ke Îmrali de îşkence yeno kerdene la gama agêra Ewropa  teslîmê faşîzmê Tirkîya bi. Do rojêke bêro nê kurdan û Rayber Apoyî ra ozrê xo biwazê. Pê na kampanya yeno waştene ke wa tecrîd bêro wedaritene. Ganî CPT şiro Îmrali. Ma zaf rey vat la hina vajê heta ke Rayberîye azad nêbo hatşîye û demokrasî nînê Tirkîya, qirkerdişê Kurdîstan nêqedîyeno û problemê Rojhelatê Mîyanênî nînê çareserkerdene. Coka ganî 7/24 saetî rojdemê ma Rayberîye bo. Ma reyna veng danê şarê xo wa tewrê çalakîyan bibo û wayîrê Rayberîya xo vejîyo.

Tekoşîne Koçgiri: Çalakîya ma do mengêke dewam bikero. Waştişê ma eşkera yo; azadîya Rayberîye. Ma xeylêk wextî yo Rayberîye ra xebere nêgênê. Pêvînayîşê keye û avûkatan nînê kerdene. Ma sere de cinî û ciwanî şarê ma her cade bibo seferber. Dişmen her ca de hêrişê ma keno. Xoverdayîşê gerîlayan ganî  ma rê bibi nimûne. Semedê ma zî gano no proses bibo prosesê fedakarîye û seferberîye. Ma pêro pîya semedê azadîye Rayberîye têkoşînî pîlêr bikerê.

Leyla İmret: Vera Rayberîye eşkera sûc yeno kerdene la dezgehê Ewropa vera naye bêveng ê. Şarê ma semedê şiknayîşê na bêvengîya vengê xo berzêr keno. Çalakîya tewr peyêne de zî no ame vînayene. Kurdan û dostanê ci reyna vat ê tecrîdî qebul nêkenê. Pîya bi na çalakîye ma do pêvînayîşanê dîplomatîkan bikerê. Qewimîyayîşê bînê ke Kurdsîtan de benê ê zî pabesteyê tecrîdî yê. Şarê kurdî ameyoxê xo azadîya Rayberîye de vîneno. Coka ganî tecrîd cade bêro wedaritene. Wext wextê azadîya Rayberîye yo. Pê tecrîdî wazenê destkewteyanê kurdan ê ke bi bedalanê pîlan ameyî destfînayene bêrê tesfîyekerdene. Coka şarê kurdî têkoşîn keno û wayîrê ercanê xo vejîyeno. Ma têkoşînî rê dewam bikerê.

Zeynepe Kayran: Vera tecrîkerdişê Rayberîya ma na çalakîye kenê. Ma verê CPTyî de yê. Ewropa tecrîdî peygoş kena, bêveng manena, paştî dana dewleta tirke. Ma vanê heta ke tecrîdê vera Rayberîye nêro qedînayene ma do nobeta xo, çalakîyanê xo rê dewam bikerê.

Asmîne Engîn: CPT vano Îmrali de îşkence esto, Konseya Ewropa bire daye ke kesê ke 20 serrî yê zîndan de yê wa vera bidîyê la Tirkîya nê çîyan nêana ca. Ma bi çalakîya xo ya Strasbourgî wazenê ke wa Rayberîya ma goreyê peymanan muamele bicvîno. Tirkîya endama Konseya Ewropa ya ganî konseye vera Tirkîya teda bikera. Nika ma serra diyîne ya Hemleya Wextê Azadîye de yê. Her gamê ke do bêrê eştenê gamê girîng ê. Çalakîyî ganî hertim bibê.