Cinîya kurde Jîna Emînî 16ê êlule de hetê 'polîsanê exlaqî' yê Îranî ra seba ke gijikê ci asayêne amebî qetilkerdene. Vera qetilkerdişê Jîna 15 rojî yo çalakîyê protestoyî dewam kenê. Roja 14. de şaristananê Sistan û Belûcistanî de bi desan kesî ameyî qetilkerdene. Nê cayan de goreyê medyaya Îranî 19, goreyê aktîvîstan de 36 kesî ameyê qetilkerdene.

Zahîdan de dima ke polîsan domanêk berd qereqol şar dekewt qereqolî û sloganî eştî. Polîsan guleyî verdayî şarî ser.

Sine de çalakîyan serkêşîya cinî û ciwanan de dewam kerd. Hêzanê Îranî vera çalakîkeran xeylêk cayan de şîdet kerd.

Xeylêk şaristananê Rojhelatê Kurdîstanî yê sey Saqiz, Kirmaşan, Ûrmîye de zî çalakîyê protestoyî ameyî kerdene.

Gîlan Xerîb de kaykerdoxo kurd ê futbolî yê taxima Traktursazî Kaw Zezayî bi bahaneya ke paştî daye çalakîkeran ame destbendkerdene.

Tehran de vizêr şewe zî çalakîyan dewam kerd.

Hetê bînî ra cenazaya domana 17 serre Nîka Şakîremîya ke roja 10. ya çalakîyan ra nata vînîbîyaye bîya, Tehran de ameye dîyene.

Huzistan, Tebrîz, Meşhed, Kîrman, Farîs û xeylêk cayan de zî çalakîyan dewam kerd.

Waştişê partî û rêxistinanê Îran û Rojhelatê Kurdîstanî ser o ewro grevo pêroyî yeno kerdene.